1 Kerin 17 - KITAWO MALEŊ Catholic

Elia gi milengela

¹ Ndelo acel jatuci wac Were m'ilwoŋo ni Elia ma wok i Tisibe iy'adec ma Giliad owaco ri kere Ahab ni, “I nyingi Rwoth Were makwo, m'abedo ŋeca pere nike thoyo kosa koth k'ocwe ma oro ario kosa adek ma bino cuka anowaci ameno.”

² Rwoth owaco ri Elia ni,

³ “Eye ka ikadhi yuthenge ma yuwok ceŋ aka ipondi milelo ma Kerith yuwok ceŋ ma Yordan.

⁴ Ibino madho pi ma wok milelo, aka atieko miyo agakere cik jobino kelo rin cemo kenyo.”

⁵ Ameno Elia otimo paka Rwoth omiyo go or aka okidho to bedo cegin gi milelo ma Kerith.

⁶ Elia oyido madho pi wok i milelo aka agakere oyido jokelo rigo mugat gi riŋo odikin g'othieno.

⁷ Rumacen ma hongo moro pi ocwiyo i milelo kwoŋbedo koth oyido kicwe.

Elia gi citho i tindi Zarefath

⁸ Rwoth owaco ri Elia ni,

⁹ “Ay, ikadhi i tindi Zarefath, cegin gi Sidon ibedi kenyo. Atieko miyo citho ma bedo kenyo cik pidhin.”

¹⁰ Ameno Elia oay aka okidho i Zarefath. Munyo otundo i waŋkac ma tindi, oneno citho moro dimo yen. Elia owaco ri citho no ni, “Mondo keli ran ye pi nyaka mathin iy'agwata ŋey amadhi.”

¹¹ Aka munyo citho kidho omo pi, Elia olwoŋo go to waco ni, “Mondo keli ran ye mugat moro bende.”

¹² Citho odwoko ni, “Akwoŋere rin i nyingi Rwoth Were perin makwo nike angoye gi mugat m'otedi. Anitie nyaka g'adhoŋ cingan ma moko iy'acero, kodi donge mo iy'agwata. Adimo yen ŋey adoki atedi acami gi wodan. Meno bino bedo cemo mawan macowe, wariy kec to watho.”

¹³ Elia owaco rigo ni, “Ikir'ilwor kadhi itedi cemo mewin. To marapena kudho tedi ran mugat mathin wok kwoŋ gimathin m'initie gine no, aka rumacen itedi aperin gi wodin.

¹⁴ Kole me a gima Rwoth waco ni, ‘Moko k'orumi i acero, aka mo k'orumi iy'agwata cuka ndelo ma An, Rwoth, anodhiri koth i piny.’ ”

¹⁵ Citho okidho to timo paka Elia owaco aka joje jobedo gi cemo ma romo ma ndelo kweth.

¹⁶ Paka Rwoth ociko luwo i Elia, moko k'orumo i acero aka mo k'orumo iy'agwata.

¹⁷ Rumacen ma hongo moro wod pa citho two matek omako to medere aka otho.

¹⁸ Citho openjo Elia ni, “Raŋo itimo ran gime? Ibino ka poyo Were reco paran ŋey imiy wodan wotho?”

¹⁹ Elia owaco ni, “Miyan jayac ka.” Elia otiŋo jayac to tero malo i kisika kama go oyido bed'iye aka orieyo i wi kitanda.

²⁰ Kenyo okwayo malo ni, “Awi Rwoth Were paran, raŋo itimo gimarac ama ri citho me. Citho me obedo ran gi wor to kuran, onyo ineko wode!”

²¹ Kenyo Elia oriere kwoŋ jayac didek to kwayo ni, “A Rwoth Were paran, dwoki kwo pa nyathi me kendo!”

²² Rwoth odwoko kwayo pa Elia, nyathi ocako ywe to limo kwo kendo.

²³ Elia odwoko jayac piny bongi min aka owaco ri citho ni, “Neni, wodin kwo!”

²⁴ Citho owaco ri Elia ni, “Onyo aŋeyo nike ibedo dhano pa Were, aka nike Rwoth adieri luwo, i in.”