1 Kerin 15 - KITAWO MALEŊ Catholic

Kere Abija ma Yuda

¹ I oro mar'apar g'aboro ma dhum pa Yerobowam, Abija obedo kere ma Yuda,

² aka odhumo ma oro adek. Yokimere oyido ilwoŋo ni Maka nyar Absalom.

³ Abija bende otimo reco acel paka bamere to ngoye g'adieri moro je ri Rwoth Were pere, paka cuny kwari mere Daudi oyido nitie.

⁴ To makad'ameno ro Daudi, Rwoth Were pere omiyo Abija wode lunjo go dhumo Yerusalem kodi geto Yerusalem.

⁵ Rwoth otimo gime kwoŋbedo Daudi otimo gim'otire ruwaŋ Rwoth, aka oluwo or pere je, kwanyo woko gima mako kwoŋ cipa Uriya Jahiti kende.

⁶ Lweny m'oyido ocako i dier Rehobowam kodi Yerobowam omedere i hongo pa Abija je.

⁷ Tim pa Abija man je ondiki i kitawo ma kigana ma mako kwoŋ kerin je ma Yuda.

⁸ Abija otho aka oyiki go i tindi pa Daudi madwoŋ, to wode m'ilwoŋo ni Asa lunjo go paka kere.

Kere Asa ma Yuda

⁹ I oro ma piero ario ma dhum pa Yerobowam kere ma Isiraili, Asa obedo kere i Yuda,

¹⁰ aka odhumo ma oro piero aŋwen g'acel i Yerusalem. Adhamere oyido obedo Maka nyar Absalom.

¹¹ Asa otimo gim'otire ruwaŋ Rwoth paka kwari mere Daudi oyido otimo.

¹² Asa oriemo woko malayin ma cwo gi mon je wok i Yerusalem aka okwanyo woko cal je m'oyido kerin ma jopen dhumo rigo jotimo.

¹³ Asa okwanyo woko adhamere bedo yok kere, kwoŋbedo adhamere oyido otimo cal ma mienirok ri were madhako Asera. Asa otoŋo piny cal no to waŋo i milelo Kidiron.

¹⁴ To makada nende Asa k'onyeko woko kalamo werin ma k'otire je, odoŋ iy'adieri ri Rwoth i kwo pere je.

¹⁵ Asa oketho gigipiny je ma bamere oyido omiyo Were, kodi zahabu gi feza ma go won bende oyido omiyo Were i Ot pa Were.

¹⁶ Lweny makirum oyido nitie i dier kere Asa ma Yuda kodi kere Basa ma Isiraili i hongo ma dhum pajo je.

¹⁷ Basa omonjo Yuda to cako geto tindi Rama ŋey wocegi ji donjo kodi wok i Yuda.

¹⁸ Kenyo kere Asa okwanyo feza gi zahabu m'oyido odoŋ i Ot pa Were kodi i cel pa kere, aka ooro gine jodhum pere moro i Damasiko, bongi kere Benhadad ma Siria, wod pa Tabirimon aka nyakwar Hezion gi mikwenda me:

¹⁹ “Weyi wariwere paka bacere mawan oyido joriwere. Neni, adhiro rin feza kodi zahabu me paka mic rin. Onyo tur riwirok perin gi Basa kere ma Isiraili, ŋey wowodhi jolweny pere wok i piny paran.”

²⁰ Kere Benhadad oyeyo mikwenda pa Asa aka ooro jomituka jolweny pere monjo tindin madongo ma Isiraili. Jomako Ijon, Dan, Abel Beth Maka, adec macegin gi jwom Galili kodi adec ma Nafital.

²¹ Munyo kere Basa owinjo gim'otimere, oweyo geto Rama aka okadho Tiriza.

²² Kenyo kere Asa owodho cik i Yuda gipi ma mito kisi nyatoro, m'ongoye ŋata wokeŋ, tiŋo telin kodi mbawin ma Basa oyido oro ma geto Rama. Aka Asa ooro jo ma geto Mizipa kodi Geba, tindi madwoŋ iy'adec pa Benyamin.

²³ Giman je ma kere Asa otimo ondiki i kitawo ma kigana ma mako kwoŋ kerin je ma Yuda. To i oro pere ma tiyo ŋolo omako go ro two tiendi jo.

²⁴ Asa otho aka oyiki go gi bacere pere i tindi madwoŋ pa Daudi, aka wode Yehosafat olunjo go.

Kere Nadab ma Isiraili

²⁵ I oro mar'ario ma dhum pa kere Asa ma Yuda, Nadab wod pa kere Yerobowam obedo kere ma Isiraili, aka odhumo ma oro ario.

²⁶ Nadab otimo reco ruwaŋ Rwoth paka bamere, to miyo Joisiraili timo reco.

²⁷ Basa wod pa Abija, janono pa Isakar, ociko Nadab to neko go munyo Nadab kodi jolweny pere oyido jomako tindi madwoŋ Gibethon i Filistia.

²⁸ Gime otimere i oro mar'adek ma dhum pa Asa kere ma Yuda. Ameno Basa olunjo Nadab paka kere ma Isiraili.

²⁹ Tekin Basa bedo kere, ocako neko ji ma peco pa Yerobowam je. Luwo kwoŋ mikwenda pa Rwoth ma ŋeca pere Ahija jatuci wac Were ma wok i Silo owaco, ji ma peco pa Yerobowam je oneko m'ongoye ŋat'obothi.

³⁰ Gime otimere kwoŋbedo Yerobowam okwinyo nge pa Rwoth, Were pa Isiraili, gi reco ma go otimo kodi m'omiyo Joisiraili timo reco.

³¹ Giman je ma kere Nadab otimo ondiki i kitawo ma kigana ma mako kwoŋ kerin je ma Isiraili.

³² Lweny makirum obedo i dier kere Asa ma Yuda kodi kere Basa ma Isiraili i hongo ma dhum pa joje.

Kere Basa ma Isiraili

³³ I oro mar'adek ma dhum pa kere Asa ma Yuda, Basa obedo kere ma Isiraili gipi gi Tirisa, aka odhumo ma oro piero ario g'aŋwen.

³⁴ Basa otimo reco ruwaŋ Rwoth to miyo Joisiraili timo reco paka Yerobowam m'open dhumo rigo.