1 Kerin 14 - KITAWO MALEŊ Catholic

Tho pa wod pa Yerobowam

¹ I hongo no Abija wod pa Yerobowam otwo swa.

² Aka Yerobowam owaco ri cege ni, “Ay, aka irukere i nger matek niaŋ kwoŋin, aka ikadhi i Silo, kama jatuci wac Were Ahija bed'iye, go m'owaco nike abino bedo kere ma Isiraili.

³ Ter rigo mugat muma apar, mugat moro m'owir'iye mo, kodi agwata ma mo kic. Go bino waco rin gima latimo nyathi.”

⁴ Ameno cipa Yerobowam otimo ameno. Oay aka okidho i Silo, peco pa Ahija. Onyo waŋ Ahija oyido kinen ro tiyo.

⁵ Aka Rwoth oyido owaco ri Ahija nike cipa Yerobowam oyido bino penjo go kwoŋ wode m'oyido two. Aka Rwoth owaco ri Ahija gima wowaci. Munyo cipa Yerobowam otundo, orendere pa ŋatiman.

⁶ To munyo Ahija owinjo mayindo tiende munyo go donjo, owaco ni, “Donji, cipa Yerobowam, raŋo irendere pa ŋatiman? Kole anitie rin gi mikwenda marac.

⁷ Kadhi iwaci ri Yerobowam nike me a gima Rwoth, Were pa Isiraili waco rigo ni, ‘Ayerin kwoŋ Joisiraili to alokin jadhum pa ji paran Isiraili.

⁸ Amayo ot pa Daudi ker t'amiyin. Aka kucel ikibedo paka ŋeca paran Daudi m'okuro or paran je, oluwan gi cunye je, munyo timo gim'otire kende i waŋan.

⁹ Itimo reco ma kalo apa jono je ma jopen dhumo rin. Ikweran, aka i ikwinyo nge paran gi timo werin man, kodi cal ma cumin ma lamo.

¹⁰ Riameno panen, abino kelo teko i ker perin aka abino neko nyikwayin je ma cwo, mathindho gi m'oti. Abino reyo woko peco perin pa woyo.

¹¹ Ŋatimoro je ma peco perin m'otho i tindi madwoŋ gwokere jobino camo delkwoŋe, aka ma jotho kam'othangere acut jobino camo delkwoŋ jo. An, Rwoth, atieko waco.’ ”

¹² Aka Ahija omedere waco ri cipa Yerobowam ni, “Onyo ay idok peco. Tekin inodonji i tindi madwoŋ ni, wodin bino tho.

¹³ Ji ma Isiraili je jobino ywak to joyiko go. Go kende kwoŋ ji ma peco pa Yerobowam am'ibino yiko maber kwoŋbedo i go kende ama Rwoth, Were pa Isiraili onwaŋo iye gima sangala go.

¹⁴ Aka kiri Rwoth bino ketho kere dhumo Isiraili, ma bino ketho ker pa Yerobowam i gike.

¹⁵ Rwoth bino miyo Joisiraili gir'acula, ma jobino yengere pa midole ma yengere i pi. Rwoth bino fudho Joisiraili wok i lowo maber me m'omiyo kwarere pajo, aka bino kedho jo kalo jwom Yufrete, rupiri jokwinyo nge pere gi timo cal ma were madhako Asera.

¹⁶ Rwoth bino jwango Joisiraili rupiri Yerobowam otimo reco, to miyo Joisiraili bende timo reco.”

¹⁷ Kenyo cipa Yerobowam oay, aka odok i Tiriza. Tekin donjo i peco pere ama, to nyathi tho.

¹⁸ Aka Joisiraili je joywak to joyiko nyathi, paka Rwoth oyido owaco luwo i ŋeca pere jatuci wac Were Ahija.

Tho pa Yerobowam

¹⁹ Kisi gima kere Yerobowam otimo, lweny m'olwenyo kodi nger m'odhumo, je ondiki i kitawo ma kigana ma mako kwoŋ kerin je ma Isiraili.

²⁰ Yerobowam odhumo paka kere ma oro piero ario g'ario. Otho aka oyiki go, to wode m'ilwoŋo ni Nadab lunjo go paka kere.

Kere Rehobowam ma Yuda

²¹ Onyo Rehobowam, wod Solomon oyido jaoro piero aŋwen g'acel munyo ocako dhum paka kere i Yuda, aka odhumo ma oro apar g'abirio i Yerusalem, tindi madwoŋ ma Rwoth oyero kwoŋ adec je i Isiraili paka kabedo ma lamo go. Yok Rehobowam oyido Nama ma wok i piny Amon.

²² Ji ma Yuda jotimo reco ruwaŋ Rwoth, aka jotimo madit to jokwinyo nge pa Rwoth kwoŋ jo, loyo kiri reco ma kwarere pajo jotimo.

²³ Kole jo bende jogero kalamo werin ma k'otire, jogeto sirin ma tele, kodi cal ma were madhako Asera ma lamo i wi tenderin kodi i tiendi yen ma jotimo tipo.

²⁴ Marac loyo, oyido nitie cwo gi mon ma jobedo malayin i kalamo werin no. Joyuda jotimo giwickwot je ma ji ma Rwoth oyido oriemo wok i lowo no jotimo i ndir ma Joisiraili oyido jodonjo iye.

²⁵ I oro mar'apar g'abic ma dhum pa Rehobowam, Sisak kere ma Misir obino to monjo Yerusalem,

²⁶ aka okwanyo lim je ma Ot pa Were gi ma cel pa kere pa kere, kiri gi kwote ma Solomon oyido otimo gi zahabu.

²⁷ Kere Rehobowam otimo kwote man gi ywel culo waŋ m'oyido otim gi zahabu aka omiyo jotel pa jokur ma waŋkac ma peco pere kuro.

²⁸ Aka oyido kisi ka kere odonjo i Ot pa Rwoth, jokur oyido jotiŋo kwote, aka jodwoko i kisika m'ikuro iye.

²⁹ Giman je ma Rehobowam otimo ondiki i kitawo ma kigana ma mako kwoŋ kerin je ma Yuda.

³⁰ I hongo me je oyido nitie lweny makirum i dier Rehobowam kodi Yerobowam.

³¹ Rehobowam otho aka oyiki go kam'oyik'iye bacere pere i tindi pa Daudi madwoŋ, aka wode m'ilwoŋo ni Abija olunjo go paka kere.