1 Jothesalonika 5 - KITAWO MALEŊ Catholic

Yikere win ri bino pa Rwoth

¹ Ki yenyere ndiko riwin, wutmere, kwoŋ hongo kodi kare ma gigipiny me latimer'iye.

² Kole wiwegi wiŋeyo maber nike Ndelo pa Rwoth labino paka jakwo ma bino wor.

³ Munyo ji jowaco ni, “Siem nitie aka gimoro je oliŋ.” Gikenyo abwap to rerok tundo rijo. Bino cale gi litho ma dhako winjo munyo cegin nywol, aka jok'obudhere be!

⁴ To win, wutmera, wikinitie i mudho, ma Ndelo no nyalo coro win pa jakwo.

⁵ Wijoje wibedo nyithindho ma lero, aka wikwo odieceŋ; wakikwo wor kosa i mudho.

⁶ Am'omiyo, wakiripi bedo ma wanindo, paka joman; waripo bedo waŋ wan odoko milengela,

⁷ rupiri ji jonindo wor, aka jomedho jomer wor.

⁸ To wan wakwo odieceŋ, aka waripo bedo milengela. Weyi waruki i kor wan yeyo kodi mar paka gilweny, gi geno kwoŋ both paka junga ma lweny.

⁹ Were k'oyeyo ni keme pere wogey wan, to ni walimi both luwo kwoŋ Rwodhiwan Yesu Kristo,

¹⁰ m'otho riwan ŋey kada wakwo kosa watho, je fodi wabino kwo gine.

¹¹ Ro wac me, kwey win cuny jowot win, aka konyere win paka eno witimo.

Fonji macowe kodi moth

¹² Wakwayo win, wutmera, ni wimiy joma jotiyo i dier win dwoŋ, joma Rwoth oyero ma telo win gi fonjo win.

¹³ Ter win jo gi dwoŋ m'oasere kodi mar, ro tic ma jotimo riwin. Bedi win i siem gi jowoti win.

¹⁴ Jowoti wan ma wamaro, waruma win ni, gwok win joma bed'abeda m'ongoye tic; miy win joma lworlwor miseni; kony win joma nyap; aka bedi win moth gi kisi dhano.

¹⁵ Neni win ni nyatoro wokiri woculi reco gi reco, to hongo je atoŋa mewin wobedi ma timo bero ri jowoti win kodi ri ji man je.

¹⁶ Bedi win gi kisangala noknok,

¹⁷ kway win hongo je ma wikikeŋ,

¹⁸ foy win Were i gimoro je ma timere; kole meno a mito pa Were riwin i Kristo Yesu.

¹⁹ Wikiri wigeŋi Cuny Maleŋ tic.

²⁰ Wikiri wicay mikwenda ma wok i dhok jotuci wac pere,

²¹ to kaŋasa win gimoro je wiŋey adieri mere; cwire win kwoŋ gimaber,

²² aka weyi win timo kiti reco je.

²³ Weyi Were ma japok siem wolonyi win kicutho; kendo wokur cuny win, paro mewin, gi delkwoŋ win, ma bu raco moro je, i ndir ma bino pa Rwodhiwan Yesu Kristo.

²⁴ Ŋata lwoŋo win genere, aka go bino timo ameno.

²⁵ Jowoti wan ma wamaro, kway win riwan bende.

²⁶ Mothi win jom'oyeyo jowot wan je gi podho akor i leŋo.

²⁷ Aruma win gi meni pa Rwoth, kisoma balwa me ri jom'oyeyo je.

²⁸ Nema pa Rwodhiwan Yesu Kristo wobedi gi wijoje. Ameno.