1 Jothesalonika 3 - KITAWO MALEŊ Catholic

¹ Macowe, wakinyalo medo ciro, am'omiyo waridho bedo kendi wan i Athen,

² kareno waoro Timothe, omin wan ma tiyo kodi wan ri Were i fonjo Wac Manyen Maber kwoŋ Kristo. Waoro go bongi win womiy win miseni gi konyo yeyo mewin,

³ aka moro kwoŋ win wokiri wogiki cen ro lweny me. Wiwegi wiŋeyo nike kiti lweny no obedo gima waripo luw'iye.

⁴ Kole munyo fodi wanitie gi win wawaco riwin ma ndir fodi k'otundo nike ibino lwenyo gi wan, aka paka wiŋeyo maber, meno a gim'otimere won.

⁵ Meno am'omiyo, munyo akinyalo ciro kendo, adhiro Timothe bino ŋeyo gima tho kwoŋ yeyo mewin. Oyido alworo ni ipoyo jakeli karatem otieko temo win, aka tic mawan onyo otho nono!

⁶ To Timothe otieko wok bongi win odwoko bongi wan, aka okelo riwan wac maber kwoŋ yeyo mewin gi mar mewin. Owaco riwan paka ndir je wipoyo wan, aka wiyenyo swa neno wan, paka bende wayenyo neno win.

⁷ Am'omiyo, wutmere, i teko mawan je kodi i candirok, walimo miseni kwoŋ win ro winjo kwoŋ yeyo mewin.

⁸ Kole pama kere onyo wakwo ka wicungo matek i Rwoth.

⁹ Kosa onyo wanyalo foyo Were riwin nedi ro kisangala ma wanigine ruwaŋ Were mawan ro win.

¹⁰ Wor g'odieceŋ wakwayo go gi cuny wan je ni woyeyi wanen win aka wanyal poŋo gima yenyere i yeyo mewin.

¹¹ Onyo weyi Were mawan kendo Bawan won, kodi Rwodhiwan Yesu, jowoyiki riwan royo ma bino bongi win!

¹² Weyi Rwoth womiy marok, i dier wiwegi kodi ri ji je, womedere gi dongo to lokere madwoŋ paka bende wamaro win.

¹³ Ameno go wonyali medo win meni i cuny win i leŋo, ŋey wibedi ma bu raco ruwaŋ Were mawan kendo Bawan, ceŋ ma Rwodhiwan Yesu odwok'iye gi ji maleŋ pere je.