1 Jothesalonika 1 - KITAWO MALEŊ Catholic

¹ Balwa m'owok bongi Paulo, Silvano kodi Timothe, Ri kitipa pa jom'oyeyo ma Thesalonika, ma jobedo apa Were Baba kodi Rwoth Yesu Kristo. Nema gi siem wobedi gi win.

Kwo kodi yeyo pa Jothesalonika

² Noknok wafoyo Were riwin, aka ndir je watuco win i kwayo mawan.

³ Kole wapoyo ruwaŋ Were mawan kodi Bawan paka wiketho yeyo mewin i tim, paka mar mewin omiyo witiyo matek, gi paka geno mewin i Rwodhiwan Yesu Kristo ocwiny.

⁴ Waŋeyo, wutmin wan, nike Were omaro win aka oyero win ni wibedi apere won.

⁵ Kole Wac Manyen Maber ma wakelo riwin, k'obino nyaka i wac kende, to obino i meni kodi i Cuny Maleŋ, gi ridho kicutho kwoŋ adieri mere. Wiŋeyo paka kwo mawan obedo munyo oyido wanigi win kenyo; aka obedo ri bero mewin won.

⁶ Wilokere joma luwo wan kodi Rwoth; aka kada wicandere tektek, wijolo mikwenda gi kisangala ma wok bongi Cuny Maleŋ.

⁷ Riameno witieko lokirok ranen ri jom'oyeyo je i Makedonia kodi i Akaya.

⁸ Kole mikwenda ma mako kwoŋ Rwoth m'owok bongi win k'otundo ri Makedonia kodi Akaya kende, to wac kwoŋ yeyo mewin i Were olak i iye je. Am'omiyo, ongoye gima di wawaci kendo.

⁹ Kole joma koro je jowaco paka wijolo wan munyo waliewo win, gi paka wiweyo lamo cal makicar to wigik bongi Were, tiyo ri Were mar'adieri odoko makwo,

¹⁰ gi kuro Wode wobin wok i polo, m'obedo Yesu, ma Were ocerino go kwoŋ jom'otho, aka ama botho wan kwoŋ keme pa Were ma labino.