1 Jokorintho 5 - KITAWO MALEŊ Catholic

Kidakana i kitipa pa jokristo

¹ Kole wawinjo ni cot nitie i dier win m'oasere gima kimitere kada i dier joma bu Were; owaci ran nike nitie nyatoro ma bedo gi ci bamere!

² Meno a gima miyo win kwoto? Kole d'onyo wiwinjo gi rem ayin to wiriemo woko ŋata timo gino wok i kweth mewin.

³ Kada nende anitie bor gi win i del, to anitie gi win i cuny; aka atieko kiri thumo banja loyo ŋat'otimo gimarac no paŋini anitie gi win kenyo.

⁴ Ka wiromo kanyacel, aka abende an gi win i cunyan, gi meni pa Rwodhiwan Yesu manitie gi wan,

⁵ wiripo cwayo ŋati me ri Sitan wonyeki delkwoŋe, g'awanya mere ŋey cunye wolimi both i ndelo pa Rwoth Yesu.

⁶ Kwoto mewin no kiripi! Wikuya ni, “Thow kada mathin nyalo miyo moko m'odwany gipi yenyo?”

⁷ Wiripo kwanyo woko thow macon mareco aka nyaka wibino bedo ma wilony. Aka ŋey wibino cale kodi moko m'odwany ma buthow, paka aŋeyo nike wibedo ameno adieri. Kole Kristo, nyathi rombo mawan ma kalima ma Kadho, otiek miyo riwan.

⁸ Am'omiyo onyo weyi watim kalima mawan, to ki gi mugat m'oketh'iye thow macon, mar'athuye kodi reco, to kodi mugat ma buthow, ma ditiro kodi adieri.

⁹ I balwa m'andiko riwin awaco ni wikiri wimakere kodi jom'odakana.

¹⁰ Akiluw kwoŋ joma bu Were ma jodakana kosa joworo, kosa jokwo, kosa jolami cal makicar ma piny me. Kole bedi ameno d'onyo wiweyo piny ka kicutho!

¹¹ Gim'akidho rigo obedo nike wikiri wimakere gi dhano ma lwoŋere ni oyeyo to odakana, wor, kosa lamo cal makicar, kosa janyeki nyingi wadi, kosa jamero kosa jakwo. Wikiri wibedi kada piny cemo gi dhano ma pameno.

¹² Aŋo ma d'omiyan athum banja ri joma woko? Kole joma ni dier jom'oyeyo ama winyalo thumo rijo banja!

¹³ Were won bino thumo banja ri joma ni woko paka ndiko waco ni, “Kwany win woko ŋatarac i dier win.”