1 Jokorintho 14 - KITAWO MALEŊ Catholic

Mic man ma wok bongi Cuny

¹ Am'omiyo wiripo bedo gi mar. Kethi win cuny win kwoŋ mic ma cuny, tektek mere mic ma tuco mikwenda ma wok bongi Were!

² Ŋata luwo dhodhok m'opokere opokere kiluw gi ji to gi Were ayin, rupiri ongoye ŋata niaŋ gima go waco. Go luwo wac m'opondo manyaliŋliŋ gi kony pa Cuny.

³ To ŋata tuco mikwenda ma wok bongi Were meno luwo gi ji, miyo ji dongo aka medo jo meni, odoko diyo cuny jo.

⁴ Ŋata luwo dhodhok m'opokere opokere won konyere kende, to ŋata tuco mikwenda ma wok bongi Were konyo kitipa pa jom'oyeyo gipi.

⁵ Onyo ayenyo ri wijoje luwo dhodhok m'opokere; to maloyo oyido d'ayenyo ni winyal bedo gi mic ma tuco mikwenda ma wok bongi Were. Kole ŋata tuco mikwenda ma wok bongi Were nigi kony loyo ŋata luwo dhodhok m'opokere, kwanyo woko ka nitie ŋata tito dwoŋ gima go waco i dhodhok ma niaŋere; ney kitipa pa jom'oyeyo gipi wolimi kony.

⁶ Onyo, wutmera, k'abino bongi win, kony aŋo m'obedi riwin ka aluwo dhodhok m'opokere ma wikiniaŋ? Ongoye kada masisiri, kwanyo woko k'akelo wac m'omenyere moro ma wok bongi Were, kosa amiyo win niaŋ kwoŋ gimoro, kosa atuco mikwenda moro ma wok bongi Were; kosa afonjo win.

⁷ Kada ka waneno kwoŋ gigipiny m'ongoye gi kwo paka madundo kosa tongol, ŋa m'oŋey dwondi wer m'ituko ka dwonde k'owoki ma tito wer no?

⁸ Aka ka k'okudhi dwondi gwara m'oŋeyere, ŋa m'oyikere ri lweny?

⁹ K'inen ameno, onyo ŋa m'oŋey gim'iluwo kwoŋe ka mikwenda perin i dhodhok m'opokere k'oŋey dwoŋ mere? Kole wac perin bino leny woko i koyo!

¹⁰ Adieri dhodhok omore i piny, to ongoye kad'acel kwoŋ jo madwoŋ mere ongoye.

¹¹ To ka akiniaŋ dwoŋ gima nyatoro luwo, meno onyo alokere jakicar ri ŋata luwo, aka go bende lokere ran jakicar moro.

¹² Paka wiwanya bedo gi mic pa Cuny, onyo maloyo je, tem win swa oro mic ma konyo gero kitipa pa jom'oyeyo gipi.

¹³ Am'omiyo, ŋata luwo dhodhok m'opokere opokere, mitere rigo kwayo mic ma tito dwoŋ mere.

¹⁴ Kole ka akwayo Were gi dhodhok m'opokere opokere meno cunyan ama kwayo to paro paran kitim gimoro.

¹⁵ Onyo atim nedi? Abino kwayo gi cunyan, t'abino kwayo gi paro paran bende; abino wero gi cunyan, t'abino wero gi paro paran bende.

¹⁶ Ka wifoyo Were gi cuny win, onyo dhano ma ndir je m'obin i dier joma kwayo owaci nedi ni Ameno i kwayo mewin ma foyo Were ma to go kuya gima wiwaco?

¹⁷ Nyalo bedo ni adieri oyido wifoyo riwin Were maber i kwayo mewin, to ŋati ca kilim kony be.

¹⁸ Afoyo Were ni aluwo gi dhodhok m'opokere opokere loyo moro je kwoŋ win.

¹⁹ To i kalamo pa jom'oyeyo Kristo d'ayenyo ni aluwi kada nyaka wac abic gi paro paran ma niaŋere, ma fonjo joman, loyo luwo wac gana apar gi dhodhok m'opokere.

²⁰ Wikiri wibedi pa nyithindho i paro mewin, wutmera; bedi win nyithindho i gima mako kwoŋ reco, to wibedo jom'otegino i paro mewin.

²¹ Ondiki ama i cik: Rwoth waco ni, “Abino luwo gi ji me, abino oro ji ma joluwo dhodhok m'opokere, gi i dhok jowiloka. To kad'ameno ji paran jok'owinjan.”

²² Am'omiyo, dhodhok m'opokere opokere meno ranyuth ri joma k'oyeyo Were to ki ri jom'oyeyo; aka mic ma tuco mikwenda ma wok bongi Were obedo ranyuth ri jom'oyeyo, makiweno ri joma k'oyeyo.

²³ Onyo ka kitipa pa jom'oyeyo gibe jocokere kanyacel aka dhano je luwo dhodhok m'opokere opokere, ka ji ma ndir je kosa joma k'oyeyo jobin, jok'owaci ni neko omako win?

²⁴ To ka wijoje wituco mikwenda ma wok bongi Were, aka dhano ma k'oyeyo kosa ma kuya gimoro obin, bino ŋeyo reco pere cungo kwoŋ gima go winjo. Ibino thumo rigo banja cungo kwoŋ gima go winjo;

²⁵ aka paro m'opondo i cunye bino wodhere kamaler. Gikenyo go bino riewere piny to lamo Were munyo tuco ni, “Adieri, Were nitie gi win!”

Can ma ripo i romo pa jom'oyeyo

²⁶ Wutmera, gim'awaco dwoŋ mere aŋo? Ka wiromo kanyacel i kwayo, ŋat'acel nitie gi wer, ŋatiman gi fonji, ŋatiman gi menyirok ma wok i wac pa Were, ŋatiman dhodhok m'opokere, aka ŋatiman jatiti dwoŋ dhodhok no. Gimoro je wobedi ma konyo kitipa pa jom'oyeyo.

²⁷ Ka nyatoro oluwi gi dhodhok m'opokere, j'ario kosa adek ma kikal kenyo ama joripo luwo, i weso, kareno ŋatiman tito dwoŋ gim'iluwo.

²⁸ K'ongoye moro manyalo tito dwoŋ mere, ere jaluwo wokiri womedere luwo i dhodhok no i romo, kwanyo woko won woluwi i nyaliŋliŋ gi Were.

²⁹ Ripo j'ario kosa adek m'omiy jo mikwenda pa Were ama jowoluwi, kareno joman jokaŋasa wac m'oluw k'otire.

³⁰ To ka ŋatiman olimo menyirok ma wok i wac pa Were, ŋat'onwaŋo luwo ripo liŋ.

³¹ Kole wijoje winyalo tuco mikwenda ma wok bongi Were ŋati acel acele, ŋey dhano je wonyali fonjirok to ji je limo meni.

³² Aka cuny pa jotuci wac Were kidhier jo wegi dhumo;

³³ ato Were k'obedo jakeli nywowirok t'obedo jakeli siem ayin.

³⁴ Paka yenyere i kitipa pa joma leŋ'iye je, mon mewin joripo liŋ i romo ma kitipa pa jom'oyeyo. K'oyey jo luwo, to joripo winjo or paka Cik bende waco.

³⁵ Ka jomito ŋeyo gimoro, joripo penjo cwogi jo yu peco. Bedo giwickwot dhako luwo i romo ma kitipa pa jom'oyeyo Kristo.

³⁶ Kosa wac pa Were ocako bongi win? Kosa wac no obino riwin kendi win?

³⁷ Ka moro ŋoyo nike go jatuci mikwenda ma wok bongi Were kosa nike go nitie kodi mic ma cuny, go ripo jolo gima andiko riwin paka obedo or pa Rwoth.

³⁸ To ka k'odewo kwoŋ wac me, meno ongoye ŋat'odew kwoŋ go bende.

³⁹ Am'omiyo, wutmera, kethi win cuny win kwoŋ tuco mikwenda ma wok bongi Were, aka wikiri wicer ji luwo dhodhok m'opokere opokere.

⁴⁰ To gimoro je ripo wotim i royo m'otire m'ocan maber.