1 Jokorintho 13 - KITAWO MALEŊ Catholic

Mar

¹ Kad'aluw dhodhok pa ji kiri g'apa malaika, t'angoye gi mar, d'acalacala olaŋ ma koko wiy jo kosa dewe ma woy nono.

² Kad'abedi gi mic ma tuco mikwenda pa Were kodi ma niaŋ kwoŋ nyaliŋliŋ je; odoko kad'abedi gi yeyo manyalo ŋilo woko gote, t'angoye gi mar, meno je fodi angoye kony.

³ Kad'anyal poko gimoro je man gine; kad'ayey delkwoŋan wowaŋ, k'angoye gi mar, meno kikonyan kada mathin.

⁴ Mar kudere odoko nigi wor; mar ongoye gi nyeko, kwoto, kosa pakirok;

⁵ mar ongoye gi gero, kosa mima; kimaki nge piyo, aka kipar kwoŋ timo raco; mar kibedi gi duro;

⁶ mar kisangala gi reco, to sangala g'adieri ayino.

⁷ Mar kijoki kicar; geno, aka kilacere.

⁸ Mar kirum cil gi cil. To mikwenda m'ituco bino coki; dhodhok m'opokere opokere bende bino rumo; aka mic ma ŋeyo gimoro bende je bino ware woko.

⁹ Kole mic ma wanigine ma ŋeyo gimoro kodi ma tuco mikwenda pa Were je jok'obedo gim'ocowere.

¹⁰ To ka gim'ocowere obin, gikenyo gima k'ocowere bino leny woko.

¹¹ Munyo fodi anyathi, aluwo paka nyathi, odoko aparo paka nyathi; munyo alokere ŋat'otegino, aweyo woko tim ma thino.

¹² Kole pama fodi waneno gigipiny ma riprip pa ndewiro ma nimnim, to rumacen wabino neno gigipiny awaŋ g'awaŋ. Pama aŋeyo gigipiny adec kende; rumacen abino ŋeyo m'ocowere, aka m'ocowere paka Were oŋeyan.

¹³ Onyo gigipiny adek me: Yeyo, geno kodi mar je joyindira, to mar ama loyo je.