1 Jokorintho 12 - KITAWO MALEŊ Catholic

Mic ma wok bongi Cuny Maleŋ

¹ Onyo, wac ma mako kwoŋ mic ma wok bongi Cuny Maleŋ, amito winiaŋ odoco kwoŋe, wutmera.

² Wiŋeyo nike munyo oyido fodi wibedo joma bu Were oyido owondi win to itero win bongi cal makicar m'obedo obadha.

³ Am'omiyo amito wiŋey ni ongoye ŋata luwo gi meni pa Cuny Maleŋ pa Were manyalo waco ni, “Wokwoŋ Yesu!” Odoko ongoye ŋata nyalo waco ni, “Yesu a Rwoth.” Ka Cuny Maleŋ ama k'omiyo go meni.

⁴ Mic ma cuny nitie m'opokere opokere, to Cuny Maleŋ acel ama poko je.

⁵ Odoko tic nitie m'opokere opokere, to Rwoth acel ama itiyo rigo.

⁶ Mic ma timo tic bedo m'opokere opokere, to Were acel won ama poko dhano je mic no.

⁷ Kisi dhano je imiyo ranyuth pa Cuny Maleŋ ri bero pa ji je.

⁸ Cuny no miyo ŋat'acel mikwenda ma rieko, ŋatiman Cuny miyo mikwenda ma ŋeyo gimoro.

⁹ Cuny acel no miyo ŋat'acel yeyo, aka ŋatiman go miyo mic m'opokere opokere ma botho two.

¹⁰ Cuny no miyo ŋat'acel meni ma timo gir'aura, ŋatiman mic ma luwo mikwenda ma wok bongi Were; aka ŋatiman, meni ma poko i dier ranyuth ma wok bongi Cuny Maleŋ kodi man ma kiwoki bonge. Ŋat'acel go miyo meni ma luwo dhodhok m'opokere opokere, ŋatiman meni ma tito dwoŋ dhodhok no.

¹¹ To Cuny acel ama timo gime je; go miyo kisi dhano mic m'opokere paka go won yenyo.

Del acel g'adec m'omore

¹² Kole paka del obedo gimoro acel manitie g'adec m'opokere, apaka bende Kristo cale. Go obedo paka del acel ma adec omore iye.

¹³ Kole wajoje, kada bedi Joyuda kodi Jopath, kosa joma ni siem kodi ŋecin, je Cuny acel am'omiyo wan batisimo i del acel, aka omiy wajoje limo Cuny Maleŋ acel.

¹⁴ Kole del k'otimi g'adec acel kende, to g'adec m'omore.

¹⁵ Bedi tiendi jo waci ni, “Paka akibedo cingi, onyo akibedo adec pa del.” Meno di k'omono go bedo adec pa del.

¹⁶ Aka bedi ithi jo waci ni, “Paka akibedo waŋ, onyo akibedo adec pa del.” Meno bende di k'omono go bedo adec pa del.

¹⁷ Bedi del gipi bedi waŋ won kende, d'owinjo wac nedi? Aka bedi del gipi bedi ithi won kende, d'oŋweyo gimoro nedi?

¹⁸ To paka nitie, Were oketho adec m'opokere ma del i kabedo pajo paka won oyenyo.

¹⁹ Bedi adec je lokere acel kende, aŋo ma d'olwoŋ ni del?

²⁰ To paka nitie, adec omore rigin, to je fodi jobedo del acel.

²¹ Am'omiyo, waŋ jo kinyal waco ri cingi jo ni, “Akiyenyin!” Kosa wic bende waco ri tiendi jo ni, “Akiyenyin!”

²² Kucel, adec ma del ma waparo ni nok gi kony, ama odoko yenyere loyo.

²³ Aka adec ma del ma waparo ni bukony odoco ama wagwoko maber swa; odoko adec ma del ma kinen maŋon odoco ama walith gine tektek,

²⁴ Aka adec m'oasa bero ama kiyeny. Were won am'oriwo wan to miyo adec m'icayo no dwoŋ.

²⁵ Ameno aka wongoye gi pokirok i del, kareno kisi adec tiyere gi nyawote.

²⁶ K'adec acel ma del olimo litho, adec m'odoŋ je jowinjo litho gine; k'adec acel omiy dwoŋ, wadi je josangala gine.

²⁷ Onyo wijoje wibedo delkwoŋ Kristo, aka kisi dhano obedo adec mere.

²⁸ Aka i kitipa pa jom'oyeyo, Were oketh'iye: Marapena jomoor, mar'ario jotuci wac Were, mar'adek jofonji, to luwo joma timo gir'aura, to luwo joma nigi meni ma botho two, kodi joma konyo jowoti gin, aka joman jodhum, kodi joma luwo dhodhok m'opokere opokere.

²⁹ Wiparo ni ji je jobedo jomoor? Kosa jotuci wac Were? Kosa jofonji? Dhano je nigi meni ma timo gir'aura?

³⁰ Kosa botho two? Kosa luwo dhodhok m'opokere? Kosa tito dwoŋ dhodhok no?

³¹ To kethi win cuny win kwoŋ mic maloyo dwoŋ ayin. Aka alanyutho win royo maber maloyo.