1 Jokorintho 1 - KITAWO MALEŊ Catholic

¹ Balwa m'owok bongi Paulo, ma i mito pa Were olwoŋi bedo jamoor pa Kristo Yesu, kodi omin wan Sositheno.

² Ri kitipa pa jom'oyeyo Were manitie Korintho, ri ji je m'olwoŋ bedo ji pa Were, ma jobedo apere i riwirok gi Kristo Yesu, kanyacel gi ji je ma kamoro je ma jolwoŋo nyingi Rwodhiwan Yesu Kristo, Rwoth mawan gi jo.

³ Were Bawan kodi Rwoth Yesu Kristo jowomiy win nema gi siem.

Silwany i Kristo

⁴ Ndiri je aketho Were paran walwa riwin, ro nema m'omiyo win kwoŋ Yesu Kristo.

⁵ Kole i riwirok gi Kristo wilokere joŋaŋo i gimoro je, tektek mere i luwo kodi i rieko mewin

⁶ paka mikwenda ma mako kwoŋ Kristo otieko ridhere i kwo mewin

⁷ to miyo wikicandi mic moro je ka wikuro nike Rwoth Yesu Kristo womenyere kamaler.

⁸ Go bino miyo win cungo matek tundo i gike, aka nyaka ibino nwaŋo win ma bu raco i Ndelo pa Rwodhiwan Yesu Kristo.

⁹ Were m'olwoŋo win riwirok gi Wode Yesu Kristo Rwodhiwan genere.

Tiakirok i kitipa pa jom'oyeyo Kristo

¹⁰ Agoyo koko riwin wutmera i nyingi Rwodhiwan Yesu Kristo: Yere win wijoje, i gima wiwaco, aka nyaka tiakirok wokiri wobedi i dier win; riwere win swa munyo winitie gi paro acel kodi atoŋa acel.

¹¹ Ato ji megi ma jowok peco pa Kilowe jodhiro ran wac nike dhawirok nitie i dier win, wutmera.

¹² Weyi awaci ama: Kisi dhano kwoŋ win waco gipere, ni “An aluwo Apolo.” Ŋati man ni, “An aluwo Petero.” Ŋati man ni “An aluwo Kristo.”

¹³ Nyutho nike Kristo opokere i diere? Kere Paulo am'otho wi musalaba riwin? Kosa batisimo ma wilimo obedo i nyingi Paulo?

¹⁴ Afoyo Were nike akibatisa win, kwanyo woko Krispo kodi Gayo.

¹⁵ Am'omiyo, ongoye ŋata nyalo waco ni wilimo batisimo i nyingan paka jofonjirok paran.

¹⁶ (Ey, abatisa Stefano kodi peco pere bende; to akipoy ni abatisa ŋatiman kendo.)

¹⁷ Kole Kristo k'ooran kibatisa ji, to tito Wac Manyen Maber ayin, makiweno gi rieko manyadhanodhano, rupiri d'omiyo tho pa Kristo bedo ma bu meni.

Kristo obedo meni kodi rieko pa Were

¹⁸ Kole mikwenda ma mako kwoŋ tho pa Kristo wi musalaba obedo gimiŋo ri jono ma jobino rwenyo; to riwan ma wabino both, obedo meni pa Were.

¹⁹ Ato ndiko waco ni, “Abino reyo woko rieko pa jomariek, to adhiro gicen niaŋ pa jom'ofonjere.”

²⁰ Onyo nyaka nikune ŋatariek? Nikune jondiko? Nikune jopiem ma joriek ma pama? Kole Were otieko nyutho ni rieko ma piny ka meno miŋo ayin!

²¹ Kole Were i rieko pere omito ni ji kiri jowoŋey go gi rieko pajo wegi. Kucel Were oridho botho joma yeyo, gi mikwenda ma wafonjo ma wiŋoyo ni miŋo.

²² Joyuda joyenyo gir'aura paka gir'anena, aka Jogris jodwaro rieko.

²³ To wan, watito Kristo m'ogur kwoŋ musalaba, mikwenda m'obedo yet ri Joyuda kodi miŋo ri Jopath,

²⁴ to ri jom'olwoŋ i dier Joyuda gi Jogris, obedo Kristo m'obedo meni pa Were gi rieko pa Were.

²⁵ Kole gima cale p'obedo miŋo pa Were fodi riek loyo rieko pa ji. Aka gima cale p'obedo nyapo pa Were nitie gi meni loyo meni pa ji.

²⁶ Onyo poyi win paka oyido winitie munyo Were olwoŋo win. Joma nok kwoŋ win ama di piny oneno paka jomariek, kosa joma nigi meni, kosa joma nigi dwoŋ i neno pa dhano.

²⁷ To Were otimo atoŋa yero gima piny ŋisa ni gimiŋo ŋey wokwoti gine wiy jomariek, kodi gima piny tero paka nyap wokwoti gine wiy jomeni.

²⁸ Were Oyero gima piny ŋisa aka cayo, aka paro ni meno ki gimoro, ŋey wonyeki woko gima piny paro nike gimadwoŋ.

²⁹ Meno aka wongoye dhano manyalo pakirok ruwaŋ Were.

³⁰ Were am'okelo win i riwirok gi Kristo Yesu, to loko Kristo bedo rieko mawan, tiro mawan gi leŋo mawan, kodi cul mareco mawan to walimo siem.

³¹ Am'omiyo, ndiko waco ni, “Ŋata mito pakirok wopakere i Rwoth.”