Zekaria 9 - MUMA MALER 2015

Bura mibiro ng’ado ni ogendini mokiewo gi jo-Juda

¹ Wach moa kuom Ruoth Nyasayee ema: Ruoth Nyasaye osechano kumo piny Hadrak, kod dala mar Damaski. Piny duto en mar Ruoth Nyasaye, mana kaka dhout Israel bende mage.

² Dala mar Hamath, mokiewo gi Hadrak bende mare, kaachiel gi mier ma Turo gi Sidon, kata obedo ni joma odak kuondego riek kamano,

³ Jo-Turom osegero ohinga ma gigeng’orego, kendo gisedhuro fedha gi dhahabu mana ka lowo.

⁴ To Ruoth Nyasaye biro mayogi mwandugi duto, mi wit e nam. Dala hie to mach biro wang’o, mi rum pep.

⁵ Ka dala Ashkelon oneno kamano, to biro bedo maluor. Gaza bende kihondko biro mako, mi geno mane Ekron nigo rum. Ruodhi mag Gaza biro lal nono, bende Ashkelon nodong’ nono maonge ji modakie,

⁶ kendo ji ma anywola ema nobed kodak Ashdod. Ruoth Nyasaye wacho niya, “Anaketh sunga ma jo-Filistia sungorego,

⁷ mi ok ginichak gicham ring’o man gi remo, kata chamo chiemo moko makuero. Jogi motony nobed joga, mi lokre achiel kuom dhout Juda. Jo-Ekron bende nolokre joga kaka ne jo-Jebus olokore.

⁸ “Anachung’ e pinya ka jarito, mondo ng’ato kik donji kata wuogi, mi wasigu ok nochak olo joga nimar aseneno thagruokgi gi wang’a.”

Ruodh Sayun mabiro

⁹ Un jo-Sayun, beduru mamor! Koguru matek, yaye jo-Jerusalem, nimar ruodhu biro iru, kolocho. Obiro komuol, kendo koidho kanyna. Chutho oidho kanyna matin. Adier, en mana nyathi kanyna.

¹⁰ Ruoth Nyasaye wacho niya, “Abiro golo geche mag lweny oa e piny Israel, kendo abiro tieko farese mag lweny man Jerusalem. Bende atunge mag jolweny biro rumo. Ruodhno nokel kue ni ogendini duto, kendo lochne noyarre, koa e nam man yo imbo nyaka nam man yo wuok chieng’, bende koa e aora Yufrate nyaka tung’ piny koni gi koni.

Okor ni nochak oger Sayun kendo

¹¹ “To un, abiro duoko jou motue, ka agolo e bur motwo maonge pi, nikech singruok mane utimo koda gi remb misango.

¹² Un joma otue ma koro nigi geno, duoguru e dalau mochiel motegno. Ahulo ni abiro guedhou nyadiriyo kuom sand mane osandugo.

¹³ Aseloko Juda atung’ kendo asetimo Israel asere. Asekawo yawuoti yaye Sayun, mi aloko ligangla ma akedogo gi jo-Yunani.”

¹⁴ Ruoth Nyasaye biro thinyore ewi joge malo, kendo obiro chielo asere mage ka mil polo. Obiro goyo tung’, mi odhi gi ahiti moa milambo.

¹⁵ Ruoth Nyasaye Manyalo Gik Moko Duto ema nobed okumbagi mi ginilo lweny ka ginyono kite mag orujre piny. Ginigo koko ka joma omer, mi ginineg ji, mi rembgi chuer mana ka remb misango miolo gi tawo e tunge mag kendo-mar-misango.

¹⁶ Kamano Ruoth Nyasaye ma Nyasachgi nores joge chieng’no mana kaka jakwath reso jambe, kendo enoketgi e pinye mana ka kite ma nengogi tek miketo e osimbo mar duong mondo omil.

¹⁷ Mano kaka gin gi mwandu mogundho kod mor maduong’! Cham gi divai biro miyo yawuotgi gi nyigi bed gi del mabeyo.