Zekaria 7 - MUMA MALER 2015

Okwer riyo kech ma ok adier

¹ Chieng’ due ang’wen, due mar ochiko e higa mar ang’wen mar loch ruoth Darius, wach Ruoth Nyasaye nobiro ni Zekaria.

² Noyudo ka jo-Bethel ooro Sherezer kod Regemelek kaachiel gi ji mamoko mondo okwa gueth kuom Ruoth Nyasaye.

³ Ne oorogi mondo gipenj jodolo manie Od Ruoth Nyasaye Manyalo Gik Moko Duto kod jonabi niya, “Wasebedo kwaywak kendo watweyo chiemo e due mar abich, kuom higni mang’enygi, to pod onego wamed timo kamano koso?”

⁴ Eka ne wach Ruoth Nyasaye Manyalo Gik Moko Duto obirona kama:

⁵ “Nyis ane ji duto kod jodolo niya, ‘Bende ne umiya duong’ adier, kuom riyo kech mane uriyogo e due mar abich gi mar abiriyo, kuom higni piero abiriyogo?

⁶ Koso kane uchiemo kendo umetho, to donge ne utimo kamano, mana ni mondo ubedgo mamor un uwegi?’

⁷ Donge mano e gima namiyo jonabi machon ohulo e kinde mane kue nitie kendo ji opong’o Jerusalem gi mier mane olwore koni gi koni, kaachiel gi piny ma yo milambo kod piny pap?”

Wich teko ema nomiyo oter ji e tuech

⁸ Ruoth Nyasaye nowacho ni Zekaria kama:

⁹ “An Ruoth Nyasaye ne awacho niya, ‘Ng’aduru bura kare, ka ng’ato ka ng’ato miyo wadgi luor kendo timone ng’wono.

¹⁰ Kik usand nyithi kiye gi mond liete, gi jopinje mamoko modak kuomu, kod joma odhier, bende kik ng’ato chan timo ni wadgi tim moroo mamono.’

¹¹ To ne gidagi, mi giloko ng’egi ka gidino itgi, mondo mi kik giwinj wachna.

¹² Bende ne gijiwo chunygi mobedo matek ka kidi, mi gitamore winjo puonj kod weche duto mane Roho mara miyo jonabi machon puonjogi. Kuom mano an Ruoth Nyasaye Manyalo Gik Moko Duto nakumogi gi mirimba.

¹³ Ne awacho niya, ‘Kaka ne gidagi winja ka aluongogi, e kaka ne adagi winjogi ka giluonga,

¹⁴ mi ariembogi kakeyogi e kind ogendini ma ok ging’eyo, ka giweyo pinygi kokethore, ma onge ng’ama luwo.’ Kamano ne gimiyo pinygi maberno olokore thim.”