Zekaria 6 - MUMA MALER 2015

One geche ang’wen mag lweny e fweny

¹ Ne achako ating’o wang’a, mi aneno geche lweny ang’wen ka wuok e kind gode ariyo. To godego ne mag mula.

² Gari mokwongo ne nigi farese ma silwende, to mar ariyo ne nigi maratenge.

³ Mar adek to ne nigi farese marachere, kendo mar ang’wen ne nigi marang’eye.

⁴ Ne apenjo malaika mane oyudo wuoyo koda cha niya, “Jaduong’, magi to ang’o?”

⁵ Eka nodwoka ni, “Magi gin yembe ang’wen mag polo mowuok e nyim Ruodh piny ngima, kuma gisebedoe ka gitiyoe.”

⁶ Gari man gi farese maratengeno dhiyo e piny ma yo nyandwat, to mano man gi farese marachere dhiyo e piny ma yo imbo man iye mogik, kendo mano man gi farese marang’eye dhiyo e piny Babulon man yo milambo. To kane farese marang’eye wuok,

⁷ ne gigombo dhi wuotho e piny duto. Omiyo Ruoth Nyasaye nowachonigi niya, “Dhiuru uwuoth e piny koni gi koni.” Mi ne gitimo kamano.

⁸ Eka ne oluonga monyisa niya, “Winji! Mago madhi yo nyandwatgo osemiyo chunya olendo gi piny ma nyandwatno.”

Osidh ni Joshua osimbo mar rapar

⁹ Bang’e wach Ruoth Nyasaye nobirona niya,

¹⁰ “Kaw fedha gi dhahabu kuom joma ne omak moter e tuech, ma nyinggi Heldai gi Tobia kod Jedaya, ma joseduogo koa Babulon, mondo idhiyo e od Josia wuod Zefania mana chieng’ mikawogieno.

¹¹ Kaw fedha gi dhahabugo mondo ilosgo osimbo, isidh ewi Joshua wuod Jehozadak jadolo maduong’,

¹² kiwachone niya, ‘Weche ma Ruoth Nyasaye Manyalo Gik Moko Duto owacho e magi: Jali e ng’at miluongo ni Badyath. Obiro dhi nyime maber, kodongo piyopiyo kama entie, kendo obiro gero Hekalu mar Ruoth Nyasaye.

¹³ Adier, en ema obiro gero Hekalu mar Ruoth Nyasaye. Bende en ema obiro bedo ruoth, kobet e kom duong’, kotiyo piny, ka jodolo konye, kendo kue nobed e kindgi ji ariyogo.’

¹⁴ To Heldai gi Tobia gi Jedaya kod Josia wuod Zefania ema nobed karito osimbo kaka rapar e Hekalu mar Ruoth Nyasaye.”

¹⁵ Ji moa kuonde maboyo nobi mondo okony tich gero Hekalu mar Ruoth Nyasaye. Kamano unung’e ni Ruoth Nyasaye Manyalo Gik Moko Duto ema oseora iru. To mano notimre mana ka uyie winjo wach Ruoth Nyasaye ma Nyasachu.