Zekaria 4 - MUMA MALER 2015

Rachung taya kod yiend zeituni

¹ Bang’e malaika mane osebedo ka wuoyo koda nodwogo mochiewa, mana ka ng’ama ochiew e nindo.

² Ne openja niya, “Ineno ang’o?” An to ne adwoke niya, “Aneno rachung taya mar dhahabu man gi tawo e wiye. Rachung tayano oting’o teyni abiriyo, kendo taya ka taya nigi kuonde abiriyo mirwakoe kitambi.

³ Bende aneno yiend zeituni ariyo e bathe, ma moro nie dir tawo korachwich, to machielo nie dire koracham.”

⁴ Bang’e napenjo malaika mane wuoyo koda niya, “Jaduong’, magi to ang’o?”

⁵ Malaika nodwoka kapenja ni, “Ikia gigi adier?” To ne adwoke ni, “Ooyo jaduong’, ok ang’eyogi.”

⁶ Eka nowachona niya, “Ruoth Nyasaye wacho ni Zerubabel kama: ‘Gik moko matimore ok timre kuom teko kata kuom nyalo, to gitimore kuom Roho mara. An Ruoth Nyasaye Manyalo Gik Moko Duto ema awacho kamano.’

⁷ Kata da bed ni thagruok mochomo Zerubabel dongo ka gode, to ginipie ka pewe. En ema obiro keto kidi matieko gero Hekalu, ka ji kok niya, ‘Mano kaka Hekalu ber! Ruoth Nyasaye mondo oguedhe.’ ”

⁸ To bende wach Ruoth Nyasaye nobirona niya,

⁹ “Kaka Zerubabel ema oseketo mise mar Hekalu, e kaka en bende ema obiro tieke. Kamano unung’e ni Ruoth Nyasaye Manyalo Gik Moko Duto ema ne oora iru.

¹⁰ Adier, kawuono wachako tijni mana marachrach, to en ng’a ma dihedhre chaye, nikech ji nobed mabor koneno Zerubabel koting’o rapim migedogo e lwete.”

Olok tiend fweny mar rachung taya

¹¹ Malaikano nowachona niya, “Teyni abiriyogo gin wenge mag Ruoth Nyasaye marango piny ngima.”

¹² Bang’e ne apenjo malaikano niya, “Yiend zeituni ariyo manie bath rachung taya koni gi konigi, nyiso ang’o?”

¹³ Ne odwoka kopenja niya, “Donge ing’eyo tiend gigo?” An to ne adwoke ni, “Ooyo, jaduong’.”

¹⁴ Bang’e nowachona niya, “Mago gin ji ariyo mowal ni tij Ruodh piny ngima.”