Zekaria 2 - MUMA MALER 2015

Zekaria janabi oneno ng’ato man gi tond pimo e fweny

¹ Ne ating’o wang’a mi aneno ng’ato koting’o tond pimo e lwete.

² Ne apenje kuma odhiye, mi odwoka ni odhi pimo Jerusalem, mondo one ane kaka borne gi lachne onego obedi.

³ Kane malaika mane awuoyogo owuok dhi, malaika machielo nothinyore kabiro romone, mowachone niya,

⁴ “Ring idhi iwachne wuowi man gi rapimno ni Jerusalem biro bedo dala maonge gi ohinga, nikech ji mabiro dakie kaachiel gi jamni nobed mang’eny mohinge.

⁵ Ruoth Nyasaye owacho ni obiro bedone ohinga mar mach molwore, kendo obiro bedone duong’ maler e diere.”

Oluong joma ne oter e tuech

⁶ Ruoth Nyasaye wacho niya, “Ne akeyou e tunge ang’wen mag piny, to koro auru, uring ua e piny ma yo nyandwat.

⁷ Adier, ringuru, un jo-Sayun modak Babulon.”

⁸ Ruoth Nyuasaye Manyalo Gik Mooko Duto oherou malich ahinya, ma ka ng’ato mulou, to ng’atno soko mana wang’a owuon. Emomiyo Ruoth Nyasaye mane oora gi ote maduong’ ir ogendini ma noyakou owacho kama:

⁹ “Abiro goyogi, mi uyakgi, un joma ne tiyonigi.” Kamano unung’e ni Ruoth Nyasaye Manyalo Gik Moko Duto ema ne oora.

¹⁰ Ruoth Nyasaye wacho kama: “Un jo-Sayun, koguru matek, kendo beduru mamor, nikech abiro mondo adag e kindu.”

¹¹ Chieng’no ogendini mang’eny nobi ir Ruoth Nyasaye mi bed joge kendo enodag e kindu

¹² Eka unung’e ni kara Ruoth Nyasaye Manyalo Gik Moko Duto ema ne oora iru. Ruoth Nyasaye biro chako kawo piny Juda kendo ka mare owuon e piny maler mi ochak otim Jerusalem dala moyiero.

¹³ Ji duto mondo oling’ e nyim Ruoth Nyasaye, nimar osechiew, moa kar dakne maler.