Zekaria 14 - MUMA MALER 2015

Gik mabiro timore ni Jerusalem kod ogendini mamoko

¹ Winjuru! Odiechieng’ Ruoth Nyasaye sudo machiegni, ma mwandu Jerusalem noyakie, mi pog mana e wang’u kuneno.

² Enochok ogendini duto mondo oked gi Jerusalem, kendo dalano nokaw, mi mwandu manie udi noyaki, bende mon nomak gi thwon. Bath dala konchiel noter e tuech, to bathe komachielo nowe mana kanyo.

³ Eka Ruoth Nyasaye nowuogi mi ked gi ogendinigo mana ka gima okedo e paw lweny.

⁴ Chieng’no enochung’ e got Zeituni, ma omanyore gi Jerusalem yo wuok chieng’, kendo godno nobarre mi hoho maduong’, mochakore yo wuok chieng’ nyaka podho chieng’, poge ariyo. Bath got konchiel nodog yo nyandwat to bathe komachielo nodog yo milambo.

⁵ Unutony kuluwo hohono, nimar enochwe nyaka dhoranga dala. Adier, unutony kaka jou notony higni mang’eny mokadho, ka giringo yiengni piny mane otimore e ndalo Uzia ruodh Juda. Bang’e Ruoth Nyasaye ma Nyasacha nobi kaachiel gi malaika mage duto.

⁶ Chakre chieng’no koyo gi pe ok nobedie.

⁷ Otieno bende ok nobedie, to piny nosik mana odiechieng’ lilo, kendo kata ka piny olokore odhiambo to ler nosik asika. Ruoth Nyasaye kende ema ong’eyo ndalo ma gigo biro timoree.

⁸ Chakre chieng’no, pi maliw nomol kawuok Jerusalem. Moko nochik Nam Kado, man yo wuok chieng’ to moko nochik Nam Mediterenia, man yo podho chieng’. Enosik komol e ndalo chwiri kendo e ndalo oro mana machalre.

⁹ Chakre chieng’no, Ruoth Nyasaye nobed ruodh piny ngima, kendo ji duto nolame ka Nyasachgi, mi ng’eye gi nyinge achiel ma Ruoth Nyasaye.

¹⁰ Piny duto mokiewo gi Jerusalem nobed mopie ka pap, chakre Geba, kochomo milambo nyaka Rimon. Jerusalem to nosik koting’ore ating’a kama entie, chakre dhorangach miluongo ni Dhoranga Benjamin, nyaka dhorangach man yo kama ohinga ogomogo, kendo chakre kama oger mabor mar ng’icho mar Hananel nyaka kuonde mibiyoe mzabip ruoth. (Kuma ohinga ogomogo, chon ne nitie dhorangach moro.)

¹¹ Ji nodag Jerusalem gi kue, ka onge ng’ama bwogogi ni ibiro kuong’ dalagi mondo okethi.

¹² Ruoth Nyasaye nogo ogendini duto mane okedo gi Jerusalem gi tho marach. Thono nochal kama: Ringregi notow mana ka gichung’ gi tiendgi, kendo wengegi notow mana e wigi, to lewgi bende notow mana e dhogi.

¹³ Chieng’no Ruoth Nyasaye nogogi gi kihondko malich, kendo ng’ato ka ng’ato nomak wadgi mondo ogorego.

¹⁴ Jo-Juda bende nokony jo-Jerusalem e lweny kendo giniyak mwandu mag ogendini mokiewo kodgi, kaka fedha gi dhahabu kod lewni mogundho.

¹⁵ Bende tho machalo gi mano mane ogoyo jogo nogo farese gi nyumbu gi ngamia kod kenje manie kambi mag wasigu, mi neg pep.

¹⁶ Bang’ lweny, ji duto motony e ogendini mane omonjo Jerusalemgo nobi higa ka higa mondo olam Ruoth Nyasaye Manyalo Gik Moko Duto ka ruodhgi, kendo mondo otim Sap Kiche.

¹⁷ To ka dhoot moro mar ogendini ma e piny ok odhi Jerusalem mondo olam Ruoth Nyasaye Manyalo Gik Moko Duto ka ruodhgi, to koth ok nochue e pinygi.

¹⁸ Bende ka jo-Misri ok odhi mi ochopo e dalano, to giniyud tuo machal gi mano ma Ruoth Nyasaye biro kelo ni oganda moro amora ma ok odhi mondo otim Sap Kiche.

¹⁹ Mano e kum ma ibiro kumogo jo-Misri kod ogendini mamoko ma ok odhi Jerusalem mondo otim Sap Kiche.

²⁰ Chakre chieng’no, kata mana okode mag farese nogorie weche mawacho niya, ‘Mowal ni Ruoth Nyasaye,’ kendo agulni mitedogo e Hekalu nobed mowal ni tich Ruoth Nyasaye mana ka tewni mitiyogo e kendo-mar-misango.

²¹ Agulni duto manie Jerusalem kod Juda nobed mowal ni tich Ruoth Nyasaye, kendo ji duto matimo misengni nokaw moko mondo ochwakie ring misango. Kamano ka kindeno ochopo, to onge johala moro amora ma nochak oyud e Hekalu mar Ruoth Nyasaye Manyalo Gik Moko Duto.