Zekaria 12 - MUMA MALER 2015

Res ma ibiro resogo jo-Israel

¹ Ma en wach Ruoth Nyasaye kuom Israel: Ruoth Nyasaye mane oyaro polo, kendo oketo mise mar piny, mi omiyo dhano much ngima wacho kama:

² “Anami Jerusalem chal gi agwata mar kong’o, ma ogendini mokiewo kode biro madho, mi kwang’ ka joma omer. Ka ogendinigo goyo ni Jerusalem ageng’a, to miech Juda bende giniluor.

³ Chieng’no ka ogendini duto mag piny ochokore mondo omonj Jerusalem, to naloke obed mapek ka kidi, ma onge ng’ama nyalo ting’o, kendo ogendini duto motemo ting’e, nohinyre marach.

⁴ “An Ruoth Nyasaye awacho niya, chieng’no anago farese duto gi kihondko, mi ami joma idhogi lokre joneko. Anarit jo-Juda, to farese mag ogendini mamokogo analok muofni,

⁵ mi dhout Juda nowach kendgi niya, ‘Joma odak Jerusalem yudo teko kuom Ruoth Nyasaye Manyalo Gik Moko Duto ma Nyasachgi.’

⁶ “E kindeno anami dhout Juda bed ka mach manie bungu kata manie puoth tiang’. Ginitiek ogendini duto mokiewo kodgi koni gi koni. Jo-Jerusalem to nodag gi kue e dalagi.

⁷ An Ruoth Nyasaye nakuong miyo dhoudi duto mag Juda locho, mondo duong’ mar dhood Daudi kod jo-Jerusalem kik lo duong’ ma jo-Juda mamoko nigo.

⁸ “Chieng’no an Ruoth Nyasaye nabed okumba ni jo-Jerusalem, mi kata mana ng’ama yomyomie moloyo kuomgi nobed motegno ka Daudi, kendo joka Daudi nobed jotend ji mana kaka Nyasaye kata malaika mare.

⁹ Bende anatiek ogendini duto mabiro mondo omonj Jerusalem.

¹⁰ Anami joka Daudi gi jo-Jerusalem chuny mang’won, kendo mohero lemo. Eka bange giniteg wang’gi kuom jal mane gichwowo, mi otho, kendo giniywage mana ka joma ywago nyathi ma miderma. Adier, giniywag malit mana ka joma ywago wuodgi makayo.

¹¹ “E kindeno ywak nobed malich Jerusalem mana ka ywak mane oywaggo Hadad-rimon e paw Megido.

¹² Dhoudi duto ma e piny noywagi kar kendgi, ka mondgi bende ywak kar kendgi. Joka Nathan

¹³ gi joka Lawi kod joka Shimei bende noywag kamano ka mondgi bende ywak kar kendgi.

¹⁴ Dhoudi mamoko duto bende noywagi kar kendgi, ka mondgi bende ywak kar kendgi.”