Zekaria 11 - MUMA MALER 2015

¹ A Lebanon, yaw dhorangeyeni, mondo mach owang’ yiendi mabeyo mag sida!

² Ywaguru un yien duto, nimar yiend sida osepodho. Adier, yien madongo osekethi. Un yiend Bashan, ywaguru, nimar bungu ma yien odichie osebeti.

³ Winjuru kaka jotelo ywak ka chunygi lit, nimar duong’ ma yande gin-go olal nono. Adier, winjuru kaka giywak ka sibuoche maruto nimar bung Jordan ma gidakie osekethi.

Jakwath maber gi jakwath marach

⁴ Ruoth Nyasaye ma Nyasacha nowachona niya, “Bed jakwadh rombe ma ibiro yang’o,

⁵ nikech jokwadhgi giwegi ok dewgi. Joma ng’iewogi bende negogi, to ok yud kum. Giloko ringgi pesa, kendo giwacho niya, ‘Opak Ruoth, nikech waseyudo mwandu!’ ”

⁶ Ruoth Nyasaye nomedo wacho niya, “Ok anakech joma odak e pinyni, to abiro keto ng’ato ka ng’ato e lwet jatende kendo e lwet ruodhe, mi jotelogo noketh piny, to ok anares ji e lwetgi.”

⁷ Kuom mano ne adoko jakwadh rombe miyang’o, ka atiyo ni joohand rombe. Bang’e ne akawo ludhe ariyo, mi achako achiel ni, ‘Ng’wono’, to machielo ne achako ni, ‘Riwruok’. Kamano ne abedo jakwadh rombe.

⁸ Kane pok due achiel orumo, ne ariembo jokwath adek nikech ne gijoga, kendo gin bende chunygi nosin koda.

⁹ Bang’e ne awacho ni rombe niya, “Ok abi medo bedo jakwadhu kendo. Mago kuomu matho, to otho athoya, kendo mago madwaro lal, olal alala, to mago modong’, moro ka moro oneg wadgi.”

¹⁰ Eka ne akawo ludha miluongo ni Ng’wono, mi aturo, ka anyisogo ni singruok mane Ruoth Nyasaye otimo gi ogendini duto okethi.

¹¹ Kamano singruok ne okethi chieng’no, kendo joohand rombe mane ranga nong’eyo ni en wach Ruoth Nyasaye.

¹² Ne awachonigi niya, “Ka uyie to miyauru pokna. To ka ok kamano, to bedgouru.” Kuom mano ne gichula pokna moromo shekel piero adek mag fedha.

¹³ Bang’e Ruoth Nyasaye nowachona niya, “Ket pesago kar keno mar Hekalu.” Omiyo ne akawo shekel piero adek mag fedhago, mane giparo ni ema oroma, mi aketo kar keno mar Hekalu mar Ruoth Nyasaye.

¹⁴ Bang’ mano ne aturo luth machielo miluongo ni Riwruok, ka anyisogo ni aketho riwruok manie kind jo-Juda gi jo-Israel.

¹⁵ Ruoth Nyasaye nowachona kendo niya, “Kaw gigi, ichak iwuondri ni in jakwath, to bed jakwath manono,

¹⁶ kaka ranyisi ni abiro keto jakwath e piny ma ok rang rombe matho, kata ok many molal, kata ok thiedh matuo, bende ma ok kwa mago mangima, to chamo mana mago machue, kendo mwodo koda ka orengegi.

¹⁷ Masira ochomo jakwath manono ma jwang’o rombeno! Ligangla biro lwar e bade kendo e wang’e ma korachwich, mi bade tal, kendo wang’e ma korachwich nokethre chuth.”