Zekaria 10 - MUMA MALER 2015

Okor ni Ruoth Nyasaye biro waro joge

¹ Kwauru Ruoth Nyasaye koth e kinde mowinjore, nimar en ema okelo boche polo morweyo, eka koth chue mi dhano gi le yud chiemo.

² Nyiseche manono wacho weche maonge tiendgi, kende ajuoke neno ranyisi mag miriambo. Gileko lek ma ok adiera, kendo giwacho weche mawito ji. Mano emomiyo ji bayo abaya ka rombe, kendo githagore nikech gionge jakwath.

³ Ruoth Nyasaye wacho niya, “Mirima omaka gi jotend joga, omiyo abiro kumogi. To an Ruoth Nyasaye abiro konyo jo-Juda, ma akwano ka jamba, mi ami gibed marateke ka farese mag lweny.

⁴ Bende ginibed motegno ka kite moriwo kor ot, kendo ka loye migurogo hema. Ginichal gi atung’ moywa mochiek ni lweny, kendo kuomgi ema jotend lweny duto nowuogie.

⁵ Ginibed ka jolweny marateke ma nyono wasikgi ka chuodho, kendo ginikedi nikech an Ruoth Nyasaye an kodgi, bende ginilo kata mana joidh farese, mi gikuod wigi.

⁶ Abiro miyo jo-Juda bed marateke, kendo abiro miyo jo-Israel locho. Bende anachak aguedhgi, nikech asekechogi, mi ginichal ka gima ne ok ajwang’ogi, nikech an Ruoth Nyasachgi, kendo abiro dwoko kwayogi.

⁷ Jo-Israel nochal gi jolweny marateke, bende ginibed moil ka joma ometho. Nyithindgi none kamano, mi bed mamor, kendo ginipak Ruoth Nyasaye gi ilo.

⁸ “Abiro luongogi gi liyo mondo achokgi, mi ginibed mang’eny mana kaka ne gin chon.

⁹ Kata obedo ni nakeyogi e kind ogendini man maboyo kamano, to ginipara, mi gipidh nyithindgi kuondego. Bang’e giniduogi.

¹⁰ Anagolgi Misri gi Asuria, kakelogi dala, bende anakelgi e piny Gilead gi piny Lebanon, nyaka chop piny pong’ thich.

¹¹ Ka ging’ado nam Misri, to apaka nokue. Adier, kuonde matut duto mag aora Nael noduon. Sunga ma jo-Asuria sungorego nodwok piny, kendo loch mar Misri norum.

¹² To an Ruoth Nyasaye ema nami jo-Israel teko, mi ginipaka ka gimiyo nyinga duong’. An Ruoth Nyasaye ema awacho kamano.”