Zekaria 1 - MUMA MALER 2015

Oluong jo-Israel mondo oduog ir Ruoth Nyasaye

¹ E due mar aboro, higa mar ariyo mar loch ruoth Darius, wach Ruoth Nyasaye nobiro ni janabi Zekaria, wuod Berekia ma wuod Iddo, kawacho niya,

² “Ruoth Nyasaye nokecho ahinya gi kwereu.

³ Emomiyo wach ni ji ni Ruoth Nyasaye Manyalo Gik Moko Duto owacho kama: Duoguru ira mondo an bende aduog iru.

⁴ Kik ubed machal gi kwereu mane jonabi machon ywaknigi kawacho ni, ‘Ruoth Nyasaye Manyalo Gik Moko Duto wacho niya, “Weuru yoreu maricho kod timbeu mamono mondo uduog ira.” ’ To ne ok gichiko itgi kata dewo wechena ne ok gidewo. An Ruoth Nyasaye ema awacho kamano.

⁵ Ang’eyo ni unyalo penja ni kwereu ni kanye, kata ni jonabigo pod ngima?

⁶ To donge wechena gi chikena mane amiyo jotichna ma jonabi mondo osiemgo kwereu ne otimore, mi masira omakogi? Koso donge ne gilokore mi giweyo timbegi maricho, ka giwacho niya, ‘Ruoth Nyasaye Manyalo Gik Moko Duto osetimonwa kaka nochano. Adier, osetimonwa mana maromre gi timbewa.’ ”

Zekaria janabi oneno farese e fweny

⁷ Due piero ariyo gang’wen, due mar apar gachiel miluongo ni Shebat, e higa mar ariyo mar loch Darius, wach Ruoth Nyasaye nobiro ni Zekaria janabi, wuod Berekia ma wuod Iddo mi nowacho kama:

⁸ Nende aneno fweny gotieno ni ng’ato oidho faras masilwal, kochung’ e kind yien e holo moro. To kadieng’eye ne nitie farese ma silwende gi marabuore kod marachere.

⁹ Kane anenogi kamano, ne apenjo malaika moro mane oyudo wuoyo koda niya, “Jaduong’, magi ang’o?” Ne odwoka ni, “Abiro nyisi tiendgi.”

¹⁰ Eka ng’at mane ochung’ e kind yienno nowacho niya, “Mago e joma Ruoth Nyasaye oseoro mondo owuothi e piny ngima koni gi koni.”

¹¹ Bang’e jogo nodwoko malaika mane ochung’ e kind yien niya, “Wasewuotho e piny ngima koni gi koni, mi wanwang’o ni okue kendo oboch.”

¹² Eka malaika mar Ruoth Nyasaye nowacho niya, “A Ruoth Nyasaye Manyalo Gik Moko Duto, nyaka karang’o ma ibiro betie ka ok idewo Jerusalem kaachiel gi mier mag Juda, ma isebedo kikechogo kuom higni piero abiriyogi?”

¹³ Ruoth Nyasaye nodwoko malaika mane osebedo kawuoyo koda, kohoyo chunye gi weche mabeyo.

¹⁴ Kuom mano, malaikano nowachona niya, “Dhiyo inyis ji ni weche Ruoth Nyasaye Manyalo Gik Moko Duto e magi: ‘Hera maduong’ ma aherogo Jerusalem gi Sayun miya mirima.

¹⁵ Akecho ahinya gi ogendini ma neno maber, nikech kane pok mirima omaka ahinya gi joga to ne gisandogi moloyo kaka owinjore.

¹⁶ Emomiyo an Ruoth Nyasaye awacho kama: Aseduogo Jerusalem gi ng’wono mondo akeche. Omiyo kanyo ema ibiro chako igeroe oda, kaachiel gi udi mamoko duto.’ ”

¹⁷ To bende malaikano nowachona ni mondo anyis ji ni, Ruoth Nyasaye wacho kama: “Miecha duto biro pong’ gi gik moko mabeyo, mi anachak aho Sayun, kendo anatim Jerusalem dala ma ayiero.”

Zakaria janabi oneno tunge gi jotheth e fweny

¹⁸ Ne ating’o wang’a mi aneno tunge ang’wen.

¹⁹ Eka ne apenjo malaika mane wuoyo koda ni, “Magi to ang’o?” Ne odwoka ni “Gin ruodhi mosekeyo jo-Juda gi jo-Israel kod jo-Jerusalem.”

²⁰ Bang’e Ruoth Nyasaye nonyisa jotheth ang’wen,

²¹ mi apenjo gima gibiro timo. Ne odwoka niya, “Gisebiro mondo gibwog kendo gilo tunge ang’wen-go. Tungego gin ruodhi mane okeyo jo-Juda, ma onge kata ng’at achiel mane nyalo ting’o wiye.”