Zefania 3 - MUMA MALER 2015

Richo jo-Israel ong’wonnigi

¹ Mano wach malit manade kuom dala Jerusalem, ma jasand ji, kendo monyorore ma japiem!

² Ne ok onyal yie kwer mane ikwerego, kendo ne odagi winjo puonj. Bende ne ok oyie kuom Ruoth Nyasaye, kata mana sudo machiegni kode ne ok osudo.

³ Jotende ne chalo gi sibuoche ma ruto e iye, kendo ruodhi mage ne chalo gi ondiegi mawuotho gotieno, ma ok we piny ru ni gimoro ka pok gitieko,

⁴ Jonabi mage ne joyiem, kendo ne ok gin jonabi madiera, bende jodolo mage ne ok dew gik mowal ni Nyasaye, kendo ne giketho chik.

⁵ To Ruoth Nyasaye man Jerusalem timo mana gik makare. Ok otim gimoro marach to ong’ado bura gi adiera okinyi kokinyi mak olewo ngang’. Jaricho to wiye ok kuodi.

⁶ Ruoth Nyasaye wacho kama: “Aseyweyo ogendini ka yuech, kendo ohingni ma gigeng’orego okethore chuth. Asemiyo wang’yoregi olokore thim ma onge ng’ama luwo. Miechgi bende okethore, kendo odong’ nono ma onge joma odakie.

⁷ Ne aparo ni jo-Jerusalem diwinj chikna, omiyo ne awachonigi niya, ‘Luorauru, kendo winjuru puonjna.’ To kata kamano ne giketo chunygi mana kuom timo timbegi mamono.

⁸ “Kuom mano an Ruoth Nyasaye, awachonu niya, ‘Ritauru! Adier, rituru chieng’ ma abiro chung’ie ka ayalou, nimar asechano choko ogendini kod dhoudi kanyakla, mondo aol kuomgi mirimba duto maliet ka mach, kendo mabiro wang’o piny duto ma tiek pep.

⁹ Bang’e anapwodh dho ji mondo an Ruoth Nyasaye ema gilama, ka gitiyona gi chuny achiel.

¹⁰ Joga malama kendo moke loka aora mag Ethiopia, nobi kakelona mich.

¹¹ Chieng’no, in Jerusalem ok niyud wichkuot kuom timbeni mamono mane ipiemgo koda, nimar e kindeno anagol jogi ma josunga kendo ma jong’ayi, mi ok nichak isungri kendo e goda maler.

¹² To joma nawe nobed joma odhier kendo mathagore.

¹³ Jo-Israel modong’ noyud kar resruok e nying Ruoth Nyasaye. Ok ginichak gitim timbe mamono, kendo weche mag miriambo miwuondogo ji ok nowuog e dhogi, nimar ginichal gi rombe machiemo kendo nindo piny, ma onge ng’ama bwogo.’ ”

¹⁴ Un jo-Sayun, koguru gi mor! A jo-Israel, gouru mahu matek! Ee, beduru mamor gi chunyu duto, yaye, jo-Jerusalem,

¹⁵ nimar Ruoth Nyasaye oseriembo wasiku, motero kuma bor. Ruoth Nyasaye ma Ruodh Israel nie kindu, omiyo ok unuchak uluor masira.

¹⁶ Wach ma nobi ni Jerusalem chieng’no e ma: A jo-Sayun, kik ubed maluor, kendo kik uwe lwetu nyosre.

¹⁷ Ruoth Nyasaye ma Nyasachu nie kindu, mondo oritu maber mana ka jalweny. Obiro bedo mamor nikech un, mi ochak onyisu herane, kower gi mor nikech un, mana kaka ne otimo chon.

¹⁸ Ruoth Nyasaye wacho niya, “Abiro golo masiche oko kuomu, mi ok ginimiu wichkuot kendo.

¹⁹ Winjuru! Ka kindeno ochopo, to anakum joma thirou. Anakony rang’onde, kendo anachok joma oke, mi alok wichkuot mane joga nigo obed pak gi huma e piny ngima.

²⁰ Ka kinde ochopo monego achokue, to anakelu dala. Anamiu pak kod huma e kind ogendini duto mae piny, ka adwokonu gueth mane un-go chon, mana kuneno. An Ruoth Nyasaye ema awacho kamano.”