Zefania 2 - MUMA MALER 2015

Okor wach ni piny Juda gi ogendini molwore biro podho

¹ Chokreuru kanyakla, un oganda ma onge gi wichkuotni,

² ka pok oteru kuma bor, mi ulal nono ka mihudhi! Ee, chokreuru, kapok Ruoth Nyasaye okelo mirimbe mager kuomu, kata kapok chieng’ mirimbe ochopo.

³ Dwaruru Ruoth Nyasaye un jogo duto modak e piny, kobolore kendo korito chikene. Bende dwaruru tim makare, bende beduru gi chuny mamuol nimar dipo ka uyudo kar konyruok, chieng’ mirimb Ruoth Nyasaye.

⁴ Dala mar Gaza ibiro we nono. Ashkelon bende biro dong’ gunda, kendo jo-Ashdod ibiro riembo mana odiechieng’ tir. Ekron to ibiro dhuolo gi lop tiende.

⁵ Mano kaka unune malit, un jo Kereth modak e dhonam! Ruoth Nyasaye wuoyo kuomu niya, “Un jo-Filistia, abiro dwoko pinyu piny. Abiro kethe mi aweye ka onge ng’ama odakie,

⁶ kendo obiro dong’ mana kama jokwath kende ema kwayoe, kendo kama rombe ema nindoe.

⁷ Jo-Juda modong’ ema nobed weg piny man e dhonam. Ginikwa jambgi e dhonam kuno, kendo giniyue e ut jo-Askelon gotieno, nimar an Ruoth Nyasaye ma Nyasachgi, abiro konyogi, mi adwoknigi gueth mane gin-go chon.

⁸ “Asewinjo ayany ma jo-Moab yanyogo joga gi ajara ma jo-Amon jarogigo, bende aseneno kaka gidonjo e lop joga manie tong’gi.

⁹ “Kuom mano, an Ruoth Nyasaye ma Nyasach Israel, akuong’ora gi nyinga awuon, ni Moab biro chalo gi Sodom, to Amon nochal gi Gomora, mi gibed kuonde ma aila gi bugni mag pundo ema opong’o, kendo mokethore nyaka chieng’. Joga modong’ noyakgi mi kaw pinygi.”

¹⁰ Mano ema nobed pok ma giniyud kuom sunga ma gin go, nikech ne giyanyo jo-Ruoth Nyasaye Manyalo Gik Moko Duto, ka gikawore malich.

¹¹ To Ruoth Nyasaye biro thinyore mondo okumgi marach! Obiro nego nyiseche duto mag piny gi kech, mi ji duto modak e pinje mae dhonembe kod chulni nokulre ka lame, ng’ato ka ng’ato e dalane.

¹² Un jo-Ethiopia bende ligangla mar Ruoth Nyasaye nonegu,

¹³ kendo norie bade kuom piny man yo nyandwat, motiek Asuria, kendo olok Nineve piny motwo mana ka piny ongoro.

¹⁴ Kueth mag jamni nogudre kuno, kaachiel gi le duto mag thim. Achuth gi otenga bende nobed kayueyo ewi sirni modong’ kochung’ kuno, kendo tula kod agak noywagi e dirise kod dhoudi, bende yien mabeyo mane obawgo kor udi nodong’ kong’iengore.

¹⁵ Ji nopenjre niya, “Koro ma e dala mane mor, kendo ogeno kuom lochne cha adier? Koso en e dala mane sungore e chunye kawacho niya, ‘Anie kende, kendo onge moro maromo koda’? To koro okethore chuth, mi olokore mana kama le mae thim ema odakie, kendo ng’ato ang’ata ma kadho kanyo wuoro, ka tang’o lwete.”