Zefania 1 - MUMA MALER 2015

Chieng’ mirimb Ruoth Nyasaye

¹ Ma e wach Ruoth Nyasaye mane obiro ni Zefania wuod Kushi ma wuod Gedalia, ma wuod Amaria ma wuod Hezekia, e ndalo Josia wuod Amon, ruodh Juda.

² Ruoth Nyasaye wacho niya, “Abiro yweyo gik moko duto manie piny, mi lal nono.

³ Abiro tieko dhano kaachiel gi le, bende abiro tieko winy ma e kor polo, kod rech ma e nam. Abiro goyo joma timbegi mono piny, mi atiek koth dhano chuth. An Ruoth Nyasaye ema awacho kamano.

⁴ “Abiro kumo jo-Juda kod jo-Jerusalem duto, mondo atiek tich lamo Baal duto mitimo ka, mi kata mana nying jodolo manono ok nowinji.

⁵ Bende abiro tieko ji maidho ewi udi, kendo kulore piny kalamo gik manie kor polo, Kod joma lama an Ruoth Nyasaye, to kendo kuong’ore gi nying Milkom, nyasaye manono,

⁶ kaachiel gi joma oselokona ng’egi, kendo ok manya kata kwaya mondo akony.”

⁷ Ling’uru thi e nyim Ruoth Nyasaye, nimar odiechienge chiegni. Ruoth Nyasaye oseloso misango, kendo osepwodho wende.

⁸ Owacho niya, “Ka chieng’ ma atimoe misango ochopo, to anakum joka ruoth kod jotendgi madongo, kaachiel gi joma luwo timbe jopinje mamoko.

⁹ Chieng’no abiro kumo jogo duto mamiel e laru mar Hekalu, kendo mapong’o od ruodhgi gi timbe mahundu kod timbe mag wuond.

¹⁰ “Chieng’no, ywak nowinjre e dharangach miluongo ni Dhoranga Rech, kendo e bath dala koma nyien, bende koko maduong’ nogore e gode,

¹¹ kendo ji modak e dala mamwalo noywagi, nimar joohala duto orumo, kendo joma loko ohand fedha otiek pep.

¹² “Chieng’no anamany Jerusalem, kamenye gi taya, mi akum joma osiko katimo atima richo, kendo wacho ni Ruoth Nyasaye ok bi timo gimoro kata matin.

¹³ Mwandugi noyaki, kendo miechgi nokethi. Giniger udi, to ok ginidagie, kendo ginipidh mzabibu, to ok ginimadh divachgi.”

¹⁴ Odiechieng’ mang’ongo mar Ruoth Nyasaye chiegni. En odiechieng’ marach, kendo obiro koringo piyopiyo, moloyo jalweny ma jang’wech.

¹⁵ Chieng’no en chieng’ bura, kendo en chieng’ ywagruok gi rem, bende en chieng’ kethruok gi lal, kod mudho gi kuyo, kaachiel gi rumbi molil kod ong’ueng’o malich. En chieng’ ma tung’ ywakie,

¹⁶ kendo sigich lweny winjoree e mier mochiel motegno, kendo kuonde moger maboyo mag ng’icho.

¹⁷ Ruoth Nyasaye owacho niya, “Abiro kelo ni ji thagruok malich, kendo ginituomre atuoma ka muofni, nikech richo ma gisetimo e nyima. Rembgi nochuer ka pi, kendo ringregi noriere, ka tow e lowo.

¹⁸ Fethgi kata dhahapgi ok noresgi.” Chieng’ ma Ruoth Nyasaye ng’adoe bura, nyiego mager ma en-go nowang’ piny duto, mi tiek pep. Kamano enotiek gik moko duto modak e piny mana ka diemo wang’.