Zaburi 96 - MUMA MALER 2015

Wend pak

¹ Weruru wer manyien ni Ruoth Nyasaye, un ji duto mae piny ngima, werneuru.

² Weruru ni Ruoth Nyasaye, kendo pakuru nyinge. Pile nyisuru ji kaka osekonyou.

³ Huluru ni ji duong’ne maler, mondo ji duto owinj timbene madongo.

⁴ Ruoth Nyasaye duong’, kendo nyaka pake malich! Adier, nyaka miye duong’ moloyo nyiseche mamoko duto,

⁵ nikech nyiseche mag ogendini mamoko duto gin mana gik manono. Ruoth Nyasaye to ochueyo polo.

⁶ Duong’ maler gi duong’ mar loch okete diere, kendo teko gi ber duto ni e Hekalu mare.

⁷ Un ji duto modak e piny, pakuru Ruoth Nyasaye. Dendeuru nikech duong’ne gi tekone.

⁸ Miuru nyinge duong’ mowinjore kode, kendo keluru chiwo e Hekalu mare.

⁹ Ka Ng’ama Ler othinyore, to un ji duto manie piny, kulreuru e nyime, kutetni.

¹⁰ Nyisuru ogendini duto niya, “Ruoth Nyasaye e Ruoth!” En ema oseguro piny motegno, ma ok nyal ng’ingni, kendo obiro ng’ado ni ji duto bura kare.

¹¹ Un polo gi piny, beduru mamor, to in nam, wuo, kaachiel gi gik moko duto manie iyi!

¹² Un pewe, beduru mail, kaachiel gi gik moko duto ma un go, kendo yien duto mae bunge bende mondo okog gi mor e nyim Ruoth Nyasaye,

¹³ nikech obiro mondo orit piny. Adier, obiro rito ji duto mae piny gi bura makare kod adiera.