Zaburi 95 - MUMA MALER 2015

Wer mipakogo Nyasaye

¹ Biuru wapak Ruoth Nyasaye gi wer. Waweruru gi mor ni jaritwa kendo jawarwa!

² Wadhiuru e nyime kwagoyone erokamano, kendo wawerne wende mag pak gi ilo

³ nikech Ruoth Nyasaye en Nyasaye maduong’. En e ruoth maduong’ie moloyo nyiseche duto.

⁴ Hohini matut mag piny ni e lwete, kendo gode maboyo bende mage.

⁵ En gi loch kuom nam, nikech en ema ne olose. Piny bende mare, nikech en ema ne ochueye.

⁶ Biuru, wakulre piny e nyim Ruoth Nyasaye ma Jachuechwa, mondo walame, kwagoyone chongwa piny,

⁷ nimar en e Nyasachwa. Wan joge, kendo oritowa kaka jakwath rito jambe. Winjuru dwonde kawuono! Owacho ni,

⁸ “Kik wiu dok matek kaka ne wi kwereu odoko matek, kane gin Meriba, chieng’ mane gin Masa e thim cha.

⁹ Ne gitema kanyo, kata obedo ni ne giseneno gik mane atimonigi.

¹⁰ Ne asin kodgi kuom higni piero ang’wen, mi awacho niya, ‘Gitamore winjo chikena, kendo ok ging’eyo yorena.’

¹¹ Mirima ne omaka, mi akuong’ora ni, ‘Ok ginidonj e piny mane adwaro miyogie yueyo.’ ”