Zaburi 94 - MUMA MALER 2015

Nyasaye ma ng’ado ni ji duto bura

¹ A Ruoth Nyasaye, in Nyasaye machulo kuor. Nyiswa kaka ichalo!

² In e jang’ad bura ni ji duto. Koro a malo mondo imi josunga gima giromogo!

³ A Nyasaye, joricho biro bedo mamor nyaka karang’o?

⁴ Joma timbegi mono biro sungore kendo kawore kuom kinde marom nade?

⁵ Ginyono jogi, yaye Nyasaye. Ee, githiro oganda miseyiero.

⁶ Ginego mond liete gi nyithi kiye, kaachiel gi jopinje mamoko modak e pinywa

⁷ Giwacho niya, “Nyasaye ok newa. Adier, Nyasach Jakobo ok dew gima watimo!”

⁸ Un joga, ere kaka unyalo bedo joma ofuwo momemore kamano? Unupuonjru karang’o?

⁹ Uparo ni Nyasaye mane ochueyo it ok winj koso? Koso ng’ama nochueyo wang’ donge neno?

¹⁰ En ema orito ogendini! Donge okumogi? Koso ng’ama puonjo dhano nyalo bedo maonge gi rieko adier?

¹¹ Nyasaye ong’eyo ni paro mag dhano nono.

¹² A Nyasaye, ng’at ma ichiko, kendo ipuonjo chikeni, en jahawi,

¹³ nikech imiye yueyo e kinde mag chandruok ka joricho to ichikonigi obadho.

¹⁴ Nyasaye ok nojwang’ joge owuon kendo ok nowegi.

¹⁵ Bura nochak ong’ad kare kendo, mi ji makare duto noyiego.

¹⁶ Onge ng’at mane ochung’ mondo okonya kuom joma richo. Adier, onge ng’at mane ochwaka kuom joma timbegi mono.

¹⁷ Kuom mano, ka dine Nyasaye we konya, to dine asedhi piyopiyo e piny ma ok wuoe.

¹⁸ Pile kane aneno ni tienda dwaro kier, to in Nyasaye ne ikonya gi herani mosiko.

¹⁹ Ka an gi parruok kendo kihondko omaka, to ikueyo chunya, kendo imiya bedo mamor.

²⁰ In ibet mabor gi jong’ad buch amwor, ma miyo timbe maricho nenore ka gik ma chik oyiego,

²¹ kendo ma chokore mondo otim ni joma kare timbe mamono, mi ng’ad ni joma onge ketho buch tho.

²² To in Ruoth Nyasaye, ema ibedona kar konyruok. In e Nyasaye ma obedona lwanda ma ageng’orae.

²³ Ibiro kumo jogo kuom timbegi mamono, mi itiekgi nikech richogi. Ee, in Ruoth Nyasachwa, ibiro tiekogi.