Zaburi 92 - MUMA MALER 2015

Wer mipakogo ber mar Nyasaye

¹ A Ruoth Nyasaye Maduong’ Moloyo, goyoni erokamano kendo pako nyingi en gima ber.

² Ee, en gima long’o hulo herani mosiko okinyi kokinyi, kaachiel gi adierani otieno kotieno,

³ kigoyoni thumbe mamit.

⁴ A Ruoth Nyasaye, timbeni madongo miya mor, kendo awer gi ilo nikech gik ma isetimo.

⁵ Mano kaka timbeni dongo yaye Ruoth Nyasaye, kendo mano kaka paroni tut!

⁶ Nitie gimoro ma ng’ama ofuwo ok nyal ng’eyo. Adier, ng’ama ming’ ok nyal winjo ni,

⁷ joma timbegi mono dongo ka buya, kendo joricho dhi nyime maber, to kata kamano, notiekgi duto chuth,

⁸ nikech in Ruoth Nyasaye ema in gi duong’ nyaka chieng’!

⁹ Wang’eyo ni wasiki biro tho, kendo joricho duto nolo mi ke nono.

¹⁰ Isemiyo abedo maratego ka jowi, kendo iseguedha kimiya mor.

¹¹ Aseneno gi wang’a ka olo joricho ma monja, bende asewinjo ka giywak.

¹² Joma kare nokar ka yiend othith. Ginidongi mana ka yiend sida man Lebanon.

¹³ Gichalo gi yien mopidhi e od Ruoth Nyasaye, ma dongo maber e Hekalu mar Nyasachwa.

¹⁴ Pod ginyago olemo kata ka giseti, bende gisiko ging’ich kendo gitegno.

¹⁵ Mano nyiso ni Ruoth Nyasaye ma lwandana en jaadiera. Adier, tim moro marach onge kuome.