Zaburi 81 - MUMA MALER 2015

Hera mar Nyasaye, kod wich teko mar jo-Israel

¹ Koguru gi mor ni Nyasaye ma jaritwa. Adier, pakuru Nyasach Jakobo gi wer.

² Chakuru goyo thum gi nyidwonge. Gouru nyatiti kod orutu mamit.

³ Gouru tung’ ka due opor, kendo ka due otegno, kunyisogo ni gin ndalo mag nyasi.

⁴ Mano e chik Israel mane Nyasach Jakobo ogolo.

⁵ Ne ogolo chikno ni jo-Israel kane omonjo piny Misri. Awinjo dwol ma ok ang’eyo, ka wacho niya,

⁶ “Ne agolo ting’ mapek e goku, mi ne amiyo ubolo odheche mane utiyogo piny.

⁷ Kane un e thagruok, to ne uluonga, mi akonyou. Ne adwokou gie boche polo mapondoe, kendo ne amiyou tem e sokni mag Meriba.

⁸ Un joga, winjuru siem masiemougo. Mano kaka agombo ni mondo uchikna itu un jo-Israel!

⁹ Kik uti ni nyiseche mamoko, bende kik ulam nyasaye moro mak mana an.

¹⁰ An e Ruoth Nyasaye ma Nyasachu mane ogolou e piny Misri. Ng’amuru dhou malach mondo apidhu.

¹¹ To joga ne ok nyal winjo wachna. Adier, jo-Israel ne odagi mako chikna.

¹² Kuom mano, ne aweyogi mondo gidhi, ka wigi tek kamano, mondo gitim mana gik ma gin giwegi ema gidwaro.

¹³ To mano kaka agombo ni mondo joga owinja. Ee, mad jo-Israel luw yorena.

¹⁴ Ka gitimo kamano, to da alonigi wasikgi piyopiyo, mi akum joma sandogi.

¹⁵ Jogo mamon koda dikulre e nyima ka luoro omako, kendo digiyud kum mochwere.

¹⁶ Damiu mogo mayomie moloyo obed chiembu, kaachiel gi mor kich mothodhi e lwanda mondo ucham nyaka uyieng’.”