Zaburi 80 - MUMA MALER 2015

Lemo mikwayogo Nyasaye mondo okony jo-Israel

¹ A Jakwadh Israel, winjwa, in ma itelo ni nyikwa Josef ka ng’ama telo ni jambe! Rienynwa in mibet e kerubi kaka ruoth mabet e kom duong’ne.

² Kony dhout Efraim gi Benjamin kod Manase gi tekoni, kendo bi mondo ireswa!

³ A Nyasaye, duogwa iri, kendo rienynwa mondo wayud resruok.

⁴ A Ruoth Nyasaye Manyalo Gik Moko Duto, ibiro sin gi lemo mar jogi nyaka karang’o?

⁵ Isemiyowa pi wang’ mondo obed chiembwa. Adier, isemiyowa agwata maduong’ ma pi wang’ opong’o, mondo wamodhi.

⁶ Iseweyo jopinje mokiewo kodwa yakowa, kendo wasikwa nyierowa anyiera.

⁷ A Nyasaye Manyalo Gik Moko Duto, duogwa iri, kendo rienynwa mondo wayud resruok.

⁸ Ne igolo yadh mzabibu e piny Misri, mi iriembo ogendini moko e pinygi, eka ipidhee,

⁹ kendo ne ibetone kama onego odongie. Tiendene ne odonjo matut e lowo, kendo bedene noyarore mokwako pinyno.

¹⁰ Tipone ne oimo gode kod yiend sida madongodongo.

¹¹ Bedene konchiel ne oyarore mochopo nam Mediterenia, to bedene ma komachielo nochopo e aora Yufrate.

¹² To koro ere gima omiyo isemuko chiel molwore? Ng’ato ang’ata makadho, tinde nyalo pono olembene.

¹³ Mbithe bende kethe, kendo le maa e thim chame.

¹⁴ A Nyasaye Manyalo Gik Moko Duto duog irwa. Rangwa gie polo, kendo bi mondo ireswa, wan yadhi mar mzabibu.

¹⁵ Ee, bi ires mzabibu ma in iwuon ema ne ipidho. Adier, kony mzabibu ma pod yot, mane imiyo odongo maber mondo obed mari iwuon.

¹⁶ Wasikwa osetong’e, momoko kuome mach! Ranggi gi gero, kendo tiekgi.

¹⁷ Ng’ama iseyiero, to onego iriti. Ee, rit wuod dhano ma isemiyo teko mondo otini.

¹⁸ Ok wanachak waweyi kendo. Konywa wabed mangima, mondo wapaki.

¹⁹ A Ruoth Nyasaye Manyalo Gik Moko Duto, duogwa iri, kendo rienynwa mondo wayud resruok.