Zaburi 79 - MUMA MALER 2015

Lemo mikwayogo Nyasaye mondo okech joge.

¹ A Nyasaye, ogendini ma ok ong’eyi osedonjo e piny jogi iwuon. Gisemiyo Hekalu mari maler obedo mogak, mi giketho Jerusalem chuth.

² Giseweyo ringre jogi ni winy gi ondiegi mondo ocham.

³ Ne ginego jogi, mi remo nomol ka pi e Jerusalem duto, kendo ne onge ng’ama nyalo yikogi.

⁴ Ogendini mokiewo kodwa goyonwa siboi, ka nyierowa kendo jarowa.

⁵ A Nyasaye, ibiro kecho kodwa nyaka karang’o? Koso mirimbi biro siko ka liel ka mach nyaka chieng’?

⁶ Ol mirimbi kuom ogendini ma ok oyie kuomi. Ee, kech gi jogo ma ok lami.

⁷ Gisenegowa wan nyikwa Jakobo kendo giseketho pinywa.

⁸ Kik ikumwa kuom richo mag kwerewa, to koro yie ikechwa piyo, nikech osejwang’wa ni pangla.

⁹ A Nyasaye ma Jawarwa, kechwa mondo nyingi oyud duong’.

¹⁰ Ere gima omiyo ogendini ma ok oyie kuomi onego openjwa niya, “Nyasachu nogo ni kanye?” A Nyasaye, wadwaro mondo ikum ogendinigo mana e wang’wa kwaneno, nikech ne gichuero remb jotichni!

¹¹ Chik iti mondo iwinj ywak joma otue, kendo tekoni maduong’ mondo omi ogony joma ong’adnigi buch tho.

¹² Ruoth, chul kuor ni ogendini mamokogo nyadibiriyo kuom achaya ma gichayigo.

¹³ To wan jogi, ma wan rombe mag kwedhi, wanagoni erokamano nyaka chieng’, kendo wanahul duong’ni ni tienge duto mabiro.