Zaburi 78 - MUMA MALER 2015

Hera ma Nyasaye oherogo joma ok ohere

¹ Un joga, chikuru itu ni puonjna, mondo uwinj gima awacho.

² Abiro wuoyo kodu gi ngero, ka anyisou tiend midhierni mane otimore chon.

³ Gin gik ma wasewinjo mi wang’eyo, kendo mane kwerewa ohulonwa.

⁴ Ok wanapandgi ni nyithindwa, to wananyis tieng’ mabiro teko Nyasaye gi timbene madongo, kod gik malich miwuoro ma osetimo.

⁵ Nyasaye nomiyo jo-Israel ma nyikwa Jakobo chikene gi buchene, mane ochiko kwerewa mondo opuonj nyithindgi,

⁶ kendo nyithindgigo opuonj tieng’ mabiro, mondo nyikwagi bende opuonjre wechego.

⁷ Kamano joma birogo noket genogi kuom Nyasaye, kendo wigi ok nowil gi gima ne osetimo, to pile ginirit chikene.

⁸ Ok onego gichal gi kweregi mane wigi tek, kendo mane odagi luoro Nyasaye. Ne gin joma chunygi yomyom, kendo ma ok ogeno kuom Nyasaye.

⁹ Jo-Efraim mane kedo gi atung’ kod asere ne oringo lweny.

¹⁰ Ne ok girito singruok mane gisetimo gi Nyasaye. Kamano ne gitamore rito chikene.

¹¹ Wigi ne owil gi gik mane osetimo, kaachiel gi honni mane osetimo,

¹² Nyasaye notimo honni e thim mar Zoan e piny Misri, mana ka kweregi neno.

¹³ Ne obaro nam, mi otelonigi nyaka gikadho, ka pi ogingore ka ohinga koni gi koni

¹⁴ E kinde mag odiechieng’ ne otelonigi gi bor polo, to otieno duto ne otelonigi gi mach maliel.

¹⁵ Ne obaro lwendni e thim, mi omiyogi pi mathoth ka pi nam.

¹⁶ Ne omiyo sokni owuok e lwanda, mi pi omol ka aora.

¹⁷ To kata kamano, pod ne gisiko mana ka gitimo richo e nyime, kendo ne gipiem e thim gi Ngama Duong’ Moloyo.

¹⁸ Ne gitemo Nyasaye marayiem, ka gikwaye chiemo mondo gineggo kech.

¹⁹ Ne giwuoyo kuome marach, ka gipenjore, niya, “Bende Nyasaye nyalo miyowa chiemo e thim ka adier?

²⁰ Chutho nogoyo lwanda, mi pi obubnie molokore aore, to koro kuon gi ring’o bende domiwa?”

²¹ Kane Ruoth Nyasaye owinjo kamano, nokecho gi nyikwa Jakobo, mi omonjogi gi mach. Adier, mirima mager nomake gi jo-Israel,

²² nikech ne ok giyie kuome, kendo ne ok gigeno ni doresgi.

²³ To kata kamano nogolo chik mondo dhout polo oyawre.

²⁴ Eka nomiyo manna, ma en chiemo moa e polo, ochuenigi ka koth mondo gicham.

²⁵ Kamano Nyasaye nomiyogi chiemb malaika, mi gichamo nyaka giyieng’.

²⁶ Bang’e tekone nomiyo yamb ugue gi yamb milambo okudho,

²⁷ moorogi winy mang’eny ka kuoyo manie dhonam, mi gibedo gi ring’o mogundho ka lowo.

²⁸ Winjgo ne olwar e dier kambi kuonde duto ma hembe nitie.

²⁹ Kuom mano ji nochiemo moyieng’, nikech Nyasaye nomiyogi gima ne gigombo.

³⁰ To kata kamano wuochegi ne ok orumo, omiyo kane pod gichiemo,

³¹ Nyasaye nokecho kodgi ahinya, monego jogi marateke, ma yawuot Israel mabeyoe moloyo.

³² To kata obedo ni ne otimonigi honni madongo kamano, to ji pod ne osiko timo mana richo, kendo ne ok ginyal yie kuom Nyasaye.

³³ Mano omiyo Nyasaye nong’ado ndalogi machiek, kokelonigi masiche apoya.

³⁴ To kane ochako negogi, joma odong’ nolokore odok ire, kendo olame matek.

³⁵ Ne gifwenyo ni kara Nyasaye Maduong’ Moloyo e lwandagi kendo jawargi.

³⁶ To kata kamano ne giwuonde ka giwachone mana weche mag miriambo.

³⁷ Ne ok giketo chunygi kuome, bende ne giweyo singruok mane gisetimo kode.

³⁸ En to nokechogi, mong’wononigi kuom richogi, mi ok otiekogi. Kinde mathoth ne omwonyo mirimbe, nikech ne ok odwar kecho kodgi.

³⁹ Ne ong’eyo ni ne gin mana ji matho, machalo yamo makudho kendo kadho.

⁴⁰ Ne gipiem kode e thim ndalo mang’eny, kendo ne gimiye mirima ndalo mathoth!.

⁴¹ Adier, ne gitemo Nyasaye kinde mang’eny, nyaka ne gimiyo Ng’ama Ler mar Israel okecho.

⁴² Wigi ne owil gi tekone maduong’, bende ne ok giparo chieng’ mane oseresogie kuom wasikgi,

⁴³ kendo kaka notimo timbe madongo kod honni e thim Zoan e piny Misri.

⁴⁴ Ne oloko aore remo, omiyo jo-Misri ne ok nyal modho e aorego.

⁴⁵ Ne ooro lwang’ni kuomgi mokayogi. Ogwende bende nokelo, moketho pinygi.

⁴⁶ Ne ooro kungu mondo ocham chambgi. Dede bende nooro mondo oketh puothegi.

⁴⁷ Noketho mzabibu maggi gi pe, kendo notieko ng’opegi gi koyo mang’ich thi.

⁴⁸ Ne onego dhogi gi pe, kendo rombe gi diek bende nomiyo polo onego.

⁴⁹ Notoyo kuomgi mirimbe mager, kokecho ahinya, ka ooro malaika maketho gik moko.

⁵⁰ Ne ok ogeng’o mirimbe, kendo kata mana weyo ngima jo-Misrigo, ne ok oweyo, to nonegogi anega gi tuo malich.

⁵¹ Adier, nonego nyithindo machwo makayo mag Misri duto, ma yawuowi mabeyoe moloyo ma nyikwa Ham.

⁵² Joge owuon to nogolo oko e piny Misri, mi otelonigi e thim kaka jakwath telo ni jambe.

⁵³ Notelonigi maber maonge masira. Wasikgi, to nam noimo!

⁵⁴ Nokelogi e pinye maler, kendo e gode mane oseloyo mokawo.

⁵⁵ Noriembo joma ne odak e pinyno, mondo oyaw ni joge thuolo, eka ne opoge ni dhout Israel, mi omiyo gidak e miechgi.

⁵⁶ To pod ne gipiem apiema gi Nyasaye Maduong’ Moloyo mi giteme. Ne gitamore rito chikene,

⁵⁷ mi giweye, kendo gindhoge mana kaka kweregi notimo. Ne gibaro mi giweyo yo, mana ka asere modir gi atung’ mobam, ma ok dimb gima onego ochiel.

⁵⁸ Ne giwang’o iye ka gilemo e hembko man kuonde moting’ore, kendo ne gimiyo nyiego omake, ka gilamo kido mag nyiseche manono.

⁵⁹ Kane Nyasaye oneno kamano, nokecho, mi odagi jo-Israel chuth.

⁶⁰ Ne odar moweyo hembe man Shilo, kama ne osebet kodakie gi ji.

⁶¹ Ne oyie ni wasigu mondo okaw Sandug Muma kama tekone gi duong’ne maler nitie.

⁶² Ne okecho gi joge owuon, mi oweyo wasikgi onegogi.

⁶³ Yawuotgi ne onegi e lweny, omiyo ne onge joma kend nyigi.

⁶⁴ Jonabi ne onegi gi ligangla, kendo mondgi ne ok nyal ywagogi.

⁶⁵ To achien, Ruoth Nyasaye ne ochiew ka ng’ama oa e nindo. Ne ochalo ng’at maratego ma kong’o oilo.

⁶⁶ Ne oloyo wasike mi omiyogi wichkuot mosiko.

⁶⁷ Ne odagi nyikwa Josef. Joka Efraim bende ne ok oyiero.

⁶⁸ To ne oyiero mana joka Juda, kod got Sayun ma ohero.

⁶⁹ Ne ogero Hekalu mare kanyo machal gi dalane e polo, kendo ne ogurore motegno mana ka piny mosiko nyaka chieng’.

⁷⁰ Nyasaye noyiero Daudi jatichne,

⁷¹ ka ogole e tich kwayo rombe. Ne okete ruodh jo-Israel ma nyikwa Jakobo, mondo obed jakwadh joge owuon.

⁷² Daudi noritogi gi chunye duto, kendo notelonigi gi rieko.