Zaburi 76 - MUMA MALER 2015

Nyasaye ma wuon loch, kendo ma jang’ad bura

¹ Nyasaye rahuma e piny Juda, kendo nyinge duong’ e piny Israel.

² Jerusalem e dalane. Ee, odak e got Sayun.

³ Kanyo ema ne oturoe aserni gi okumbni kod ligengni mag wasigu.

⁴ A Nyasaye, mano kaka nyingi duong’! Mano kaka iwuotho motegno, ka iduogo ia e gode kuma ne iloyoe wasiki.

⁵ Jolweny ma jochir osedendi, kendo koro ginindo mana nindo mar tho. Onge kata ng’at achiel modong’ ma dikonyre gi gigi mag lweny.

⁶ Kane ibwogogi, yaye Nyasach Jakobo, farese gi joithgi nogore piny, mi parogi olal.

⁷ To in, A Ruoth, ilich manade! Ere gima dichung’ e nyimi ka ikecho?

⁸ Ne imiyo bura ming’ado ong’ere gie polo. Piny nobedo moluor, kendo oling’ thi,

⁹ kane ichung’ mondo ing’ad bura, kendo mondo ires ji duto ma ithiro e piny ka.

¹⁰ Kata mana mirimb dhano keloni pak, kendo jogo motony e lweny nopaki e sewni ma gitimoni.

¹¹ Miuru Ruoth Nyasaye ma Nyasachu gima ne usingoru ni unumiye, kendo un ogendini duto modak machiegni, keluru mich ni ng’ama ji duto oluoro.

¹² En ema omiyo jodongo bolore, kendo obwogo ruodhi madongo mag piny.