Zaburi 72 - MUMA MALER 2015

Loch Ruoth Makare

¹ A Nyasaye, puonj ruoth mondo ong’ad bura mana gi adierani, kendo ipuonje timni makare.

² Kamano enorit jogi gi adiera, kendo notel ni jochan e yo makare.

³ Ji modak e gode madongo gi matindo onego odag maber gi kue.

⁴ Ruoth onego ong’ad bura kare ni joma chandore, kendo okony jochan, mi olo joma thirogi.

⁵ Onego jogi sik kalami ndalo duto, mana kaka chieng’ gi due osiko ka rieny.

⁶ Ruoth onego chal gi koth machue kendo miyo piny bedo mang’ich.

⁷ Tim makare onego olandre e ndalone, kendo ji onego odhi maber nyaka chieng’.

⁸ Pinye nochakre e bath nam man yo wuok chieng’, nyaka bath nam man yo podho chieng’, kendo nochakre aora Yufrate nyaka tung’ piny.

⁹ Ogendini modak e piny motwo nokulre e nyime, kendo wasike noriere piny tir kobolore.

¹⁰ Ruodhi mag Spania kod mag pinje manie dier nam nogolne osuru, kendo ruodhi mag Arabu gi mag Ethiopia bende nokelne mich.

¹¹ Kamano ruodhi duto nokulrene, kendo ogendini duto notine.

¹² Ka joma odhier oywakne, to oreso, kaachiel gi jochan kod joma onge gi ng’ama dikonygi.

¹³ Okecho joma ithiro kendo modhier, bende oreso ngima jochan.

¹⁴ Ogologi e thagruok, kendo e timbe mahundu, nimar okwano ngimagi ka gima nengogi tek.

¹⁵ Ruoth mondo odag aming’a. Onego oyud chiwo mar dhahabu moa Arabu. Bende onego lemne kinde duto, kendo hap Nyasaye mondo obed kode pile.

¹⁶ Onego chiemo obed mang’eny e piny, kendo cham machiek e gode mondo obed mogundho ka chamb Lebanon. Ji onego opong’ mier mana ka lum manie pap.

¹⁷ Wich kik wil gi nyinge, kendo humbe mondo osiki nyaka chieng’. Ogendini duto mondo opake, kendo onego ji duto kwa Nyasaye mondo oguedhgi kaka oseguedho ruoth.

¹⁸ Pakuru Ruoth Nyasaye ma Nyasach Israel! En kende ema otimo gik malichgi.

¹⁹ Pakuru nyinge maduong’ nyaka chieng’, kendo duong’ne maler mondo opong’ piny! Amin!

²⁰ Mano e giko lemo mag Daudi wuod Jesse.