Zaburi 7 - MUMA MALER 2015

Lemo mikwayogo bura makare

¹ A Ruoth Nyasacha, in ema ageno kuomi. Konya kendo resa kuom ji duto ma lawa,

² nikech ka ok ikonya, to ginyalo yudha ka sibuor, mi gitera kuma onge ng’ama diresae, kendo di gikidha kuno matindo tindo.

³ A Ruoth Nyasacha, kapo ni asetimo ni ng’ato marach,

⁴ kata ka po ni asendhogo osiepna moro, kata ka asehinyo jasika kayiem nono,

⁵ to onego wasika lawa mi juka, kendo goya nyaka nega, mi giweya ka atho kama apodhoeno.

⁶ Ruoth Nyasaye, a malo kikecho, mondo ithir gero ma wasika nigo.

⁷ Chok ogendini duto iri kaachiel, mondo iritgi gie polo malo.

⁸ A Ruoth Nyasaye, in e jang’ad bura ni ji duto, omiyo ng’adna bura maber, nikech an kare kendo aonge ketho.

⁹ Tiek timbe mamono mag joricho, kendo tim ni joma beyo gik ma owinjore gi timbegi. In Nyasaye ma timne kare, kendo inono chuny ji kod parogi maiye.

¹⁰ Nyasaye e okumbana, kendo en ema owaro joma oluore.

¹¹ En e jang’ad bura makare, kendo pile okwedo joricho.

¹² Ka ji odagi lokore mondo owe richogi, to Nyasaye biro piago liganglane. Kata mana koroni otwenyo atunge mondo obed moikore.

¹³ Okawo gige mager mag lweny, kendo ochielo aserini mage maliel mach.

¹⁴ Neye kaka muoch mar richo kayo joricho! Oyach mana gi timbe mamono, kendo miriasia ema onywolo.

¹⁵ Okunyo bur matut e lowo, to bang’e en ema onyumore e burno.

¹⁶ Kamano richone dok e wiye owuon, ka timbene mag mahundu hinye mana en owuon.

¹⁷ Abiro pako Ruoth Nyasaye kuom adiera mare. Abiro wero wende pak ni Ruoth Nyasaye Maduong’ Moloyo.