Zaburi 66 - MUMA MALER 2015

Wer mipakogo Nyasaye kuom timbene madongo

¹ Un ji duto, pakuru Nyasaye ka ukok gi mor.

² Weruru nyinge maduong’ kumiye pak mang’ongo.

³ Pakuru Nyasaye niya, “Mano kaka gik mitimo lich miwuoro! Tekoni duong’ ahinya, omiyo wasiki kulore gi luoro e nyimi.

⁴ Ji duto modak e piny lami kendo paki, ka gimiyo nyingi duong’.”

⁵ Biuru mondo uneye gik madongo ma Nyasaye osetimo ni ji.

⁶ Ne oloko nam odoko lowo motwo, mi kwerewa ong’ado aora gi tiendegi! Kanyo ne gibedo mamor nikech gima ne otimo.

⁷ Orito piny gi tekone nyaka chieng’, kendo orango gik ma ogendini timo. Kuom mano kik ji moko tem ni piem kode!

⁸ Un ogendini duto, pakuru Nyasachwa, kendo dwondu mupakego mondo owinji.

⁹ En ema oseritowa mangima, kendo ok oseweyo wachwanyore mi wapodho.

¹⁰ A Nyasaye isepwodhowa mana kaka ipwodho fedha gi mach.

¹¹ Ne iweyo wamoko e obadho, mi imiyowa thagruok maduong’.

¹² Ne iweyo wasikwa onyonowa, mi mach owang’owa, kendo ohula oywoyowa, to koro isekelowa kama wanyalo yweyoe.

¹³ Abiro kelo misengni miwang’o pep e hekalu mari, ka achiwoni gik mane asingora.

¹⁴ Kane an e chandruok ne asingora ni natimni misengni. Emomiyo koro abiro chiwo jamni machwe mondo owang’ e kendo mar misango,

¹⁵ kendo iro mar imbe miwang’o nodumni mamit ka ubani.

¹⁶ Un ji duto muluoro Nyasaye, biuru mondo anyisu gik ma osetimona.

¹⁷ Ne aywakne mondo okonya, kendo ne aikora mar pake gi wer.

¹⁸ Ka dine bed ni richo mitna, to Ruoth Nyasaye dine ok owinja.

¹⁹ To osewinja adier, kendo osechiko ite ni lemona.

²⁰ Apako Nyasaye, nikech ne ok odagi lemona, to osiko ohera pile.