Zaburi 63 - MUMA MALER 2015

Siso mar ng’eyo Nyasaye

¹ A Nyasaye, in e Nyasacha, kendo agombo mondo aneni. Siso omaka kodi, kendo riyo mar ng’eyi oloya mana kaka piny motwo gombo koth.

² Kuom mano, we aneni e kar dakni maler, mondo aneye tekoni gi duong’ni.

³ Herani mosiko ber moloyo bedo mangima, omiyo abiro paki.

⁴ Abiro goyoni erokamano e kinde duto mag ngimana, kendo analami, kating’o bedena malo.

⁵ Chunya nobed mamor mana ka ng’ama ochamo ondhudho kod mo, moyieng’, kendo napaki ka awer gi mor.

⁶ Ka anindo e kitandana, too in ema apari. Ee, otieno duto aparo mana in,

⁷ nikech pile isebedo konyruokna. Awer gi ilo ka ayueyo e tipo mar buombeni.

⁸ Apadora kuomi, kendo lweti rita maber.

⁹ To joma temo nega biro dhi e piny joma otho.

¹⁰ Adier, noneggi e lweny, kendo ondiegi ema nocham ringregi.

¹¹ Ruodhwa to nobed mail nikech Nyasaye, kendo jogo duto matimo singruok e nying Nyasaye bende nobed mamor. Jomriambo to noum dhogi!