Zaburi 62 - MUMA MALER 2015

Nyasaye kende e kar konyruok

¹ Nyasaye kende ema ayiengora kuome, kendo resruokna wuok mana kuome.

² En kende e lwandana kendo jawarna. Adier, en e kar konyruokna, omiyo ok anyal yiengni.

³ Un duto ubiro monjo ng’at achielni nyaka karang’o mondo unegi? To ochalo mana gi ohinga mobam madwaro podho, kata chiel mohungore konchiel!

⁴ Udwaro gole mondo oa e duong’ne, kendo umor gi wacho miriambo. Uguedhe gi dhou maoko, to chunyu maiye kuong’e akuong’a.

⁵ Nyasaye kende ema ayiengora kuome. Ee, en ema aketo genona kuome.

⁶ En kende e lwandana kendo jawarna. Adier, en e kar konyruokna, omiyo ok anyal yiengni.

⁷ Warruokna gi nyinga maber wuok mana kuom Nyasaye. En lwandana ma ageng’orae, kendo en e kar konyruokna.

⁸ Un jowa, genuru kuom Nyasaye kinde duto. Nyiseuru chandruok duto ma ungo, nimar en e kar konyruokwa.

⁹ Adier, dhano chalo mana gi muya, kendo onge gima onyalo. Ka ikete e rapim, to ok opek kata matin. Oyot moloyo muya!

¹⁰ Kik uket genou kuom timbe mahundu, kendo kik ugen yudo gimoro e yor mecho. Kata ka mwandu omedore, to kik ugen kuomgi.

¹¹ Pile asewinjo ka Nyasaye wacho ni teko duto gin mage,

¹² kendo ni herane osiko mochwere. A Ruoth Nyasaye in iwuon imiyo ng’ato ka ng’ato, pok maromre gi timne.