Zaburi 59 - MUMA MALER 2015

Lemo mar yudo resruok e lwet wasigu

¹ A Nyasacha, resa kuom wasika. Gola e lwet jogo ma monja.

² Resa kuom jorichogo, kendo konya kuom jonekgo.

³ Ok aseketho, kata timo gimoro marach, to joma kwinygo chokore mondo omonja, kendo gikiya mondo ginega.

⁴ An to aonge gi ketho ma dimi girikni mondo gibuka. A malo, Ruoth Nyasaye Manyalo Gik Moko Duto, mondo ibi ikonya.

⁵ Bi iwuon mondo ine gi wang’i, yaye Nyasach Israel! Chiew mondo ikum ogendini ma ok ong’eyi, kendo kik ikech andhoke ma jorichogo.

⁶ Giduogo godhiambo, kendo gilworore e dala, ka gigueyo ka guogi.

⁷ Winjie weche manono ma giwachogo! Lewgi bith ka ligangla, to eka pod giwacho niya, “Ere ng’ama biro winjowa?”

⁸ To in, Ruoth Nyasaye, inyierogi anyiera, kendo ikawo ogendini duto matin.

⁹ Yaye, lwandawa, in ema ageno kuomi. A Nyasaye, in e kar konyruokna.

¹⁰ Nyasacha mohera biro biro ira. Obiro nyisa wasika koselo kaka adwaro.

¹¹ A Nyasaye, dak ineggi, nimar dipo ka wi joga owil? Kegi gi tekoni, mi itiekgi chuth, A Ruoth ma okumbawa.

¹² Richo nie dhogi, kendo giwacho mana weche mamono lilo, omiyo sungagi ema onego lokrenigi obadho ma makogi!

¹³ Tiekgi gi mirimbi, mi girum chuth, nikech gikuong’o ji, kendo giriambo. Eka ji duto nong’e ni Nyasaye ema rito Israel, kendo ni lochne olandore e piny ngima.

¹⁴ Wasika duogo godhiambo, kendo gilworore e dala, ka gigueyo ka guogi.

¹⁵ Giwuotho e dala koni gi koni ka gidwaro chiemo, kendo ging’ur ka ok giyud moromogi.

¹⁶ An to nabed ka apako tekoni. Okinyi kokinyi anawer kapako herani mosiko, nikech isebedona kar konyruok.

¹⁷ A lwandana, anapaki gi wer. In e kar konyruokna, yaye Nyasaye, bende in ema ihera.