Zaburi 56 - MUMA MALER 2015

Lemo mar geno kuom Nyasaye

¹ A Nyasaye, kecha, nikech wasigu kiya mondo ohinya. Ee, gisanda sa duto.

² Odiechieng’ duto joma mon koda kiya. Joma kedo kodago ng’eny!

³ A Nyasaye Maduong’ Moloyo, ka luoro omaka, to aketo genona kuomi.

⁴ Ageno kuom Nyasaye, kendo apako singruok mare. En ema ageno kuome. Omiyo ok anyal bedo maluor. Ere gima dhano adhana ditima?

⁵ Wasika kelona chandruok e gimoro amora matimo. Kinde duto gisiko giparo mana kaka di gihinya!

⁶ Gichokore kama opondo, kendo ging’iyo gik moko duto ma atimo, ka gikiya mondo ginega.

⁷ A Nyasaye, kumgi nikech richogi. Tiekgi gi mirimbi.

⁸ Ing’eyo chandruokna duto, kendo isendikogi e kitapi. Pi wang’a bende isekano.

⁹ Chieng’ ma aywakni, to wasika noringi kendo ang’eyo ni Nyasaye ema konya.

¹⁰ Ageno kuom Nyasaye, kendo apako singruok mare. Adier, anadend singruok mar Ruoth Nyasaye.

¹¹ En ema ageno kuome, omiyo ok anyal bedo maluor. Ere gima dhano adhana ditima?

¹² A Nyasaye, anachiwni gima asesingora. Ee, anachiwni mich mar erokamano,

¹³ nikech iseresa e tho, kendo ok iweyo apodho, mi koro awuotho mana e nyimi, yaye Nyasaye, ka abet e ler marieny kuom joma ngima.