Zaburi 50 - MUMA MALER 2015

Nyasaye e jang’ad bura

¹ Ruoth Nyasaye ma Nyasach nyiseche wuoyo, kaluongo piny duto, chakre yo wuokchieng’ nyaka yo podho chieng’.

² Nyasaye rieny gi e Sayun, dala maber manimba.

³ Nyasachwa biro, to ok obi ling’ aling’a. Mach mang’ang’ni nie nyime, kendo yamb koth maratipo kudho kolwore.

⁴ Oluongo polo gi piny mondo obed joneno ka ong’ado ni joge bura.

⁵ Owacho niya, “Chokuru joma oyie kuoma, mane otimona misango ka timogo koda singruok.”

⁶ Polo hulo ni Nyasaye en jaadiera, kendo ni en owuon e jang’ad bura.

⁷ Un joga, chikuru itu mondo awuonu. Abiro hulo gik maricho ma un jo-Israel usetimo.

⁸ Aonge kodu gi wach kuom misengni miwang’o pep kod misengni mamoko mutimona pile.

⁹ To kata kamano, ok achando ruedhi mugolo e kundeu, kata nyuogi moa e abilni mau,

¹⁰ nikech le duto manie bungu gin maga, kaachiel gi dhok gana gi gana makwayo e gode.

¹¹ Ang’eyo winy duto mahuyo e kor polo, kendo gik mangima duto ma e thim gin maga.

¹² Ka da bed ni kech kaya, to ok dawachnu, nikech piny gi gik moko duto manie iye gin maga.

¹³ Koso uparo ni dacham ring ruedhi, kata ni damadh remb diek?

¹⁴ Ooyo, to erokamano ema mondo obed misango mutimona, kendo chiwuru ni Ng’ama Duong’ Moloyo gik mane usingoru.

¹⁵ Luongauru e kinde ma unie chandruok, mi anaresu, kendo unumiya duong’.

¹⁶ To Nyasaye wacho ni jaricho niya, “Ere gima omiyo iolo chikena? Koso ang’o momiyo iwuoyo kuom singruokna,

¹⁷ to isedagi ni ok rieyi, kendo ok idwar chikena?

¹⁸ Ka ineno jakuo, to ibedo osiepne, kendo inie kanyakla mar joma terore.

¹⁹ Pile iikori mar wacho weche maricho, bende ok iluoro wacho miriambo.

²⁰ Iikori mar donjo ni owadu hie. Adier, idwaro hinyo koda ka wuod meru!

²¹ Isetimo gigi duto, to nikech ok asewacho gimoro, omiyo iparo ni achalo kodi. To koro abiro kweri e wang’i ka anyisi wechego duto, achiel ka achiel!

²² Un joma ok dewa, winjuru wachna, nono to abiro kidhou matindotindo, kendo onge ng’ama nokonyu.

²³ Ng’at ma goyo erokamano, ema timona misango ma miya duong’, kendo ng’at ma oluora, ema anawar.”