Zaburi 5 - MUMA MALER 2015

Lemo mar okinyi

¹ A Ruoth Nyasaye, chik iti mondo iwinj wechena kod parona ma iye.

² Ruodha kendo Nyasacha, winj ywakna mondo ikonya.

³ A Ruoth Nyasaye, ibiro winjo dwonda gokinyi ka alami. Adier alami pile gokinyi, kendo arito mondo idwoka.

⁴ In ok in Nyasaye ma mor gi timbe maricho, kendo jaricho ok nyal biro e nyimi.

⁵ Josunga bende ok idwar neno e wang’i, kendo imon gi joricho duto.

⁶ Itieko jomriambo duto, kendo ichayo jomahundu kod jowuond duto.

⁷ An awuon to anyalo donjo e odi nikech herani maduong’. Anyalo lemo e Hekalu mari maler, kakulorani gi luor.

⁸ A Ruoth Nyasaye, an gi wasigu mang’eny, omiyo telna mondo atim mana dwaroni, kendo nyisa yoreni ratiro mondo aluw.

⁹ Adiera onge e dho wasika. Kethruok kende ema nie chunygi. Dhogi chalo gi bur mong’amo dhoge, kendo gipero ji apera gi dhogi.

¹⁰ A Nyasaye, kwedgi kendo kumgi. Parogi maricho mondo ohinygi giwegi. Riembgii oko e nyimi, nikech richogi ng’eny kendo gipiem kodi.

¹¹ We ji duto maringo iri obed mamor, kendo we giwer pile gi ilo. Rit joma oheri mondo obed mamor ahinya mana nikech in,

¹² nimar in Ruoth Nyasaye, iguedho joma oluori, kendo ng’wononi oritogi mana ka okumba.