Zaburi 49 - MUMA MALER 2015

Fuwo mar geno kuom mwandu

¹ Winjuru, un ogendini duto! Chikuru itu, un ji duto manie piny,

² Joma dongo gi joma tindo, jomwandu kata jochan.

³ Abiro wacho weche mariek, ma chunya oseparo, kendo owinjo tiendgi maber.

⁴ Anachik ita mondo awinj tiend ngero, kendo anahul tiende ka agoyo thum.

⁵ Ere gima daluor, ka anie masira, e kinde ma wasikwa ma joricho olwora?

⁶ Gin e jogo mogeno kuom mwandugi, kendo ma sungore nikech gimew ahinya.

⁷ To ng’ato ok nyal warore owuon, bende ok onyal chulo Nyasaye gima dowargo ngimane,

⁸ nikech nengo mar ngima dhano duong, malich moloyo! Gima onyalo chulo ok nyal romo mone tho,

⁹ mi odag nyaka chieng’.

¹⁰ Oneno ni kata joma riek bende tho, mana ka joma ofuwo kod joma oming’, kendo mwandugi dong’ mana ni jomoko nono.

¹¹ Liete ma oyikgie ema nobed miechgi mochwere, kendo ginisik kuno nyaka chieng’, kata obedo ni ne gin gi lopegi giwegi.

¹² Duong’ mar ng’ato ok nyal sirone tho, to enotho athoya kaka le tho.

¹³ Neyeuru gik matimore ni joma ogeno kuom tekregi giwegi, kendo winjeuru giko mar jogo mogeno kuom mwandugi.

¹⁴ Gimwomore e tho ka rombe, kendo tho nogono ema biro bedo jakwadhgi. Joma kare nogonigi siboi gokinyi, ka ringregi top e Piny Joma Otho, kuma bor gi pinygi.

¹⁵ An to Nyasaye nokonya, kendo nogola e teko mar tho.

¹⁶ Kik ibed maluor ka ng’ato odoko japith, kata ka mwandune medore,

¹⁷ nikech ka otho, to ok onyal kawo gimoro, mi odhigo. Ooyo, mwandune ok nyal lor kode e liel.

¹⁸ Kata obedo ni ngima mar pinyni ber ni ng’ato, kendo ji pake nikech odhi maber,

¹⁹ to pod obiro mana dhi kuma kwerene duto nitie, ma mudho osikoe nyaka chieng’.

²⁰ Duong’ mar ng’ato ok nyal sirone tho, to enotho athoya mana kaka le tho.