Zaburi 48 - MUMA MALER 2015

Ber gi duong’ mar Sayun

¹ Ruoth Nyasachwa duong’! Omiyo nyaka apake ahinya e dalane manie wi gode maler.

² Sayun, god Nyasaye, bor kendo ber. Ee, dala Ruoth maduong’ kelo mor ni piny ngima.

³ Joma odak e ut Jerusalem madongo, oseng’eyo ni Nyasaye e kar konyruok motegno.

⁴ Ruodhi nochokore kanyakla, mi obiro mondo omonj got Sayun.

⁵ To ka ne gineno godno, ne gibwok, kendo luoro nomakogi, mi giringo.

⁶ Luoro gi rem nomakogi kanyo, mana ka dhako ma muoch kayo,

⁷ kendo ne gitagore, mana ka yiedhi madongo madhi Tarshish, ma yamb ugue tago.

⁸ Ne awinjo gik ma Nyasaye osetimo, to koro wasenenogi gi wang’wa e dala Ruoth Nyasachwa ma Nyasach ogendini. En dala ma oguro motegno nyaka chieng’.

⁹ A Nyasaye, waparo herani mosiko ei Hekalu mari.

¹⁰ Ji duto paki kuonde duto, kendo humbi oselak e piny duto. Irito ji adiera,

¹¹ omiyo jo-Sayun bedo mamor. Ing’ado bura kare, omiyo ilo opong’o mier mag Juda.

¹² Wuothuru e got Sayun, kendo lworeuru, kukwano kuonde moger maboyo mag ng’icho

¹³ Bende nonuru ohingane, kaachiel gi kuonde mochiel motegno mag siro lweny,

¹⁴ mondo chieng’ moro unyis tieng’ mabiro ni Nyasayeni en Nyasachwa mochwere, kendo obiro telonwa nyaka chieng’.