Zaburi 47 - MUMA MALER 2015

Nyasaye e ruodh piny ngima

¹ Un ogendini, pamuru gi mor! Pakuru Nyasaye, kukok matek.

² Mano kaka Ruoth Nyasaye Maduong’ Moloyo lich miwuoro! En Ruoth Maduong’ morito piny ngima,

³ Kendo omiyo ogendini bedo e bwo lochwa! Ee, oketo ogendini duto e bwowa.

⁴ Ne oyieronwa piny ma wadakieni. En piny maber mar Jakobo, mane Nyasaye ohero.

⁵ Nyasaye oseidho malo e kome, ka ji kok gi mor. Ee, Ruoth Nyasaye oseidho e kom duong’ne, ka tung’ ywak mamit.

⁶ Pakuru Nyasaye gi wende pak! Adier, pakuru ruodhwa gi wer!

⁷ Nyasaye e Ruodh piny duto. Pakeuru gi wende mamit.

⁸ Nyasaye obet e kome maler, ka en gi loch kuom ogendini.

⁹ Jotelo mag ogendini chokore kanyakla gi jo-Nyasach Ibrahim. En ema en gi loch kuom gik moko duto.