Zaburi 45 - MUMA MALER 2015

Wer mar kend ruoth

¹ Weche mamit opong’o chunya e sa ma achungoe wendni ni ruoth, kendo lewa chalo kalamb jondiko molony.

² In e ng’at ma jaberie moloyo ji duto, kendo in e jatwak mong’ith. Omiyo Nyasaye oseguedhi nyaka chieng’.

³ Tue liganglani e nungoni, yaye ruoth maratego, man gi teko kod duong’.

⁴ Dhi adhiya kiidho farasi, kirwakori gi lep duong’, mondo ilo, kendo ikel adiera gi muolo kod bura makare. Tekoni maduong’ biro miyo itimo timbe madongo!

⁵ Aserni magi bitho, kendo hobo chuny wasiki. Ogendini podho apodha e tiendi.

⁶ Lochni chalo gi loch Nyasaye mosiko nyaka chieng’, kendo irito pinyi gi adiera,

⁷ Ihero timbe makare to imon gi timbe maricho. Mano emomiyo Nyasaye ma Nyasachi oseyieri ruoth, mowiri gi mo komiyi mor mang’eny moloyo mor ma osemiyo jowadu.

⁸ Lepi duto dum manemane gi poda kod dalasini. Jothum bende miyi mor e udi mabeyo mobaw malich gi lak liech.

⁹ Nyiri moko manie dalani gin nyi ruodhi, to e bath komi korachwich, chiegi ochung’ie, korwakore gi dhahabu maler moa Ofir.

¹⁰ Chik iti nyara, mondo iwinj weche ma awacho, kendo ipargi. Wiyi mondo owil gi jou kaachiel gi wedeni.

¹¹ Chia mari biro miyo ruoth heri. En ruodhi, omiyo nyaka iluore.

¹² Jo-Turo nokelni mich. Jomwandu bende notem mondo oyud kaka ng’iyo kodi.

¹³ Nyar ruoth ni e odgi, to mano kaka ojaber! Lepe ochue mana gi usi mar dhahabu.

¹⁴ Ne otere ir ruoth ka orwakore gi law majaber, ka nyige mag harusi luwe. Nyigo bende nokel ir ruoth.

¹⁵ Gibiro, kendo gidonjo e od ruoth, ka gikok gi mor maduong’.

¹⁶ In, ruodha, ibiro nywolo yawuowi mang’eny, mondo ikaw kar kwereni, kendo iniketgi jotelo e piny ngima.

¹⁷ Analand humbi ni tienge duto, omiyo ogendini nopaki nyaka chieng’.