Zaburi 44 - MUMA MALER 2015

Kony machon gi chandruok ma kawuono

¹ A Nyasaye, wasewinjo gi itwa, ka kwerewa hulonwa timbe madongo mane itimo e ndalogi.

² Ne ginyisowa kaka in iwuon ne iketogi e pinywani to iriembo ogendini mane ok ong’eyi, kendo kaka ne ikumo ogendini mamokogo, to imiyo jogi iwuon odak maber.

³ Jogigo ne ok okawo piny gi gigegi mag lweny, bende ne ok gilocho gi tekregi giwegi. To ne gilocho mana nikech tekoni maduong’, kendo nikech ne in kodgi. Mano e kaka niherogi!

⁴ In e Ruodha kendo Nyasacha. Imiyo jogi ma nyikwa Jakobo locho.

⁵ Waloyo wasikwa gi tekoni, kendo wanyono joma kedo kodwa nikech in.

⁶ Atung’ gi ligangla ok nyal miyo alo,

⁷ to in ema iresowa kuom wasikwa, kendo iseloyo joma mon kodwa, mikuodo wigi.

⁸ Pile wabiro paki, kendo goyoni erokamano nyaka chieng’!

⁹ To koro, yaye Nyasaye, isedagiwa, mi imiyo wasikwa oloyowa. Ndalogi ok idhi gi jolwenjwa e lweny.

¹⁰ To isemiyo waringo wasikwa, mi giyako giwa.

¹¹ Ne ijwang’owa, mi oyang’wa ka rombe, kendo ikeyowa e pinje moko nono.

¹² Ne iuso jogi iwuon kuom nengo matin, maonge ohala!

¹³ Jopinje mamoko ma okiewo kodwa neno gima itimonwa.

¹⁴ Ne ilokowa ngero ma ogendini goyo, omiyo gigoyonwa siboi, ka gijarowa.

¹⁵ Pile aparo mana kaka nyinga kethore, kendo wichkuot ohinga,

¹⁶ nikech wasikwa nyierowa, kendo yanyowa, ka chulo kuor.

¹⁷ Gigo duto osetimorenwa, to kata kamano, pok wiwa owil kodi, kata ketho singruok mane itimo kodwa.

¹⁸ Pok waweyi, bende tiendewa pok obaro, moweyo yori.

¹⁹ To kata kamano, ne ibolowa e kind ondiegi! Ee, ne ijwang’owa e mudho mandiwa mar tho.

²⁰ Ka dine wawe lami, A Nyasaye, mi walam nyasach piny moro nono,

²¹ to difwenyo, nikech in ing’eyo paro maling’ling’ mag ji.

²² To inegowa seche duto nikech in, kendo wachalo mana gi rombe midwaro yang’o.

²³ A Ruoth Nyasaye, chiew! Ang’o momiyo inindo? A malo! Kik ijwang’wa nyaka chieng’!

²⁴ Ere gima omiyo ipandonwa wang’i, ka wiyi owil gi chandruok kod thagruok ma wan go?

²⁵ Wagore piny, mi wayikore e buru, ka wariere.

²⁶ A malo mondo ikonywa! Yie ireswa nikech herani mosiko.