Zaburi 41 - MUMA MALER 2015

Lemo mar Jatuo

¹ Ng’at ma konyo joma odhier en jahawi. Ruoth Nyasaye norese ka en e thagruok.

² Ruoth Nyasaye nokonye, kendo norite. Enomi odag gi kue e piny, kendo ok nojwang’e e lwet wasike.

³ Ruoth Nyasaye nokonye ka otuo, mi change.

⁴ Ne awacho ni Ruoth Nyasaye niya, “Asetimo richo e nyimi, to yie ikecha mondo ichanga.”

⁵ Wasika wacho gik maricho kuoma. Giwacho niya, “Obiro tho karang’o, mondo wich owil kode?”

⁶ Ji mabiro lima, chunygi bor koda. Gidwaro mana winjo weche maricho kuoma, mondo gidhi gilandni ji.

⁷ Ji duto ma mon koda kuodha e kindgi giwegi, kendo gik mahinya ema gimorgo.

⁸ Giwacho niya, “Yamo marach omake. Ok nochak ochung’ e kitandane.”

⁹ Koda ka osiepna ma ageno moloyo, kendo mane chiemo koda, bende oselokore jasika.

¹⁰ A Nyasaye, kecha, kendo changa mondo achulnigi kuor.

¹¹ Ka aneno ni wasika ok oloya, eka anang’e ni imor koda.

¹² Inikonya nikech atimo gik makare, kendo iniketa buti nyaka chieng’.

¹³ Wapakuru Ruoth Nyasaye, ma Nyasach Israel. Ee, pakeuru sani, kendo nyaka chieng’! Amin! Amin!