Zaburi 40 - MUMA MALER 2015

Wer mipakogo Nyasaye kuom yudo warruok

¹ Ne arito kony mar Ruoth Nyasaye gi kinda. Bang’e nochiko ite, mi owinjo ywakna.

² Ne oywaya ka ogola e bur malich, mi awuok e chuodho motimo otodo. Eka ne oketa e lwanda, mi achung’ motegno.

³ Ne opuonja wer manyien mipakogo Nyasachwa. Ji mathoth moneno kamano biro bedo maluor, kendo gibiro keto genogi kuom Ruoth Nyasaye.

⁴ Ng’at mogeno kuom Ruoth Nyasaye, kendo ma ok lam gik maket, bende ma ok riwre gi joma lamo nyiseche manono, en jahawi.

⁵ A Ruoth Nyasacha, isetimonwa gik mang’eny miwuoro. Onge ng’ama inyalo pimo kodi! Gik moko duto ma isechanonwa kelonwa gweth. Ka da anyalo hulogi duto mi awuo kuomgi, to ging’eny ma ok anyal tieko.

⁶ Ok misango kod chiwo ema imorgo to isemiya it mondo awinji. Misengni miwang’o pep, kod misengni mag golo richo, bende ne ok idwaro.

⁷ Omiyo nawacho niya, “Era e, A Nyasaye. Gima idwaro ni mondo atim ondiki e kitap chik.

⁸ Amor ahinya ka atimo gima idwaro. Ee, akano chikni e chunya.”

⁹ A Ruoth Nyasaye, asehulo wach maber e chokruok maduong’ ni in e jawar. Ing’eyo ni ok anyal mung’o wachno, yaye Nyasaye.

¹⁰ Ok asepando timni makare e chunya, to aselando ni in jaadiera, kendo ni ijares ji. Bende ok asemung’o herani mosiko kod adierani e chokruok maduong’.

¹¹ A Ruoth Nyasaye, ang’eyo ni ok ibi weyo bedona mang’won. Herani mosiko gi adiera mari rita nyaka chieng’.

¹² Masiche mathoth olwora, kendo ging’eny mokadho akwana! Richona osehinga, omiyo koro ok anyal neno. Ging’eny mohewo yie wiya kendo chunya oseol.

¹³ A Ruoth Nyasaye, yie iresa! Reti piyo mondo ikonya, yaye Ruoth Nyasaye.

¹⁴ We joma dwaro ketho ngimana oyud wichkuot giduto, mi ging’eng nono. Bende jogo ma giyo kamor ni ahinyora onego dwok chien, kendo wigi okuot.

¹⁵ Ee, joma goyona siboigo onego odhier nono kologi.

¹⁶ To ji duto mabiro iri obed mamor kendo mail. Ji duto mohero warruok maa kuomi onego wach pile niya, “Mano kaka Ruoth Nyasaye duong’!”

¹⁷ An jachan, kendo ok anyal yudo kaka akonyora, to yie ipara in Ruoth Nyasaye. In e jakonyna kendo jawarna. Kik ideki, yaye Nyasacha!