Zaburi 4 - MUMA MALER 2015

Lemo mar odhiambo

¹ A Nyasaye ma jaritna, yie idwoka ka aluongi. Kane anie thagruok, to in ema ne ikonya. Koro chak ikecha, kendo iwinj ywakna!

² Un ji ubiro yanya nyaka karang’o, kuhero mana gik manono, kendo kuluwo yore mag miriambo?

³ Ng’euru ni Ruoth Nyasaye oseyiera mondo abed mare owuon, kendo ka aluonge to owinja.

⁴ Kata ka mirima omakou machal nadi, to kik utim richo. Paruru matut ahinya kuom wachno, ka un kendu mos e uteu.

⁵ Timuru ni Nyasaye misengni mowinjore, kendo keturu geno maru kuome.

⁶ Ji mang’eny wacho niya, “Mano kaka wagombo yudo gueth! A Nyasaye, ting’ wang’i mondo irangwa gi ng’wononi!”

⁷ Mor ma imiya duong’ moloyo ma joma nigi cham kod divai mang’eny nigo.

⁸ Sa asaya ma arierae piny, to nindo tera mos: A Nyasaye, in kende ema irita maber, omiyo adak gi kue.